ԱՄՆ-ի Սենատի դեմոկրատները նախագահ Բարաք Օբամային կոչ են անում պետական պարտքի առաստաղը բարձրացնել իր կարգադրությամբ` չսպասելով Կոնգրեսի որոշմանը` հաղորդում է RIA Novosti-ն:
Օբամային ուղղված Սենատի դեմոկրատների առաջնորդ Հարի Ռիդի նամակում ասվում է, որ եթե հանրապետականներն իրականացնեն իրենց սպառնալիքները և գործողություններ չձեռնարկեն, ապա նախագահը պարտավոր կլինի ձեռնարկել ցանկացած օրինական գործողություն և, եթե անհրաժեշտ է, առանց Կոնգրեսի հաստատման: Դեմոկրատների կարծիքով` նման քայլեր պետք է ձեռնարկել` երաշխավորելու համար, որ ԱՄՆ-ը չի խախտի իր պարտականությունները և չի դառնա հերթական համաշխարհային ֆինանսական ճգնաժամի պատճառ:
Սենատորը հիմնվում է ԱՄՆ-ի Սահմանադրության 14-րդ ուղղման վրա, որի համաձայն` ԱՄՆ նախագահն ունի նման իրավունք:
Միաժամանակ ուղղման տեքստը, որը վերաբերում է պետական պարտքի առաստաղի բարձրացմանը, ոչ միանշանակ մեկնաբանություն ունի: Պահպանողական փաստաբանների մի մասը կարծում է, որ այն նախագահին չի լիազորում հրամանագրով բարձրացնել պետական պարտքի առաստաղը:
Նշենք, որ ԱՄՆ-ի պետական պարտքը ներկա պահին կազմում է 16.394 տրիլիոն դոլար. վերջին անգամ այն բարձրացվել է 2012թ. հունվարին:
