Սիրիայում հակամարտությունը պետք է լուծվի քաղաքական, այլ ոչ թե՝ ռազմական ճանապարհով: Այս մասին այսօր հայտարարել են եռակողմ հանդիպման ժամանակ, որին մասնակցել են ՄԱԿ-ի և ԱՊԼ–ի հատուկ բանագնաց Լախդար Բրահիմին, ՌԴ արտաքին գործերի փոխնախարար Միխայիլ Բոգդանովը և ԱՄՆ պետքարտուղարի առաջին տեղակալ Ուիլյամ Բերնսը:
Հանդիպումը, որը տևել է 5 ժամ, կայացել է Ազգերի պալատում, որտեղ գտնվում է Ժնևում ՄԱԿ-ի եվրոպական բաժինը: Այդ ընթացքում բանակցության մասնակիցները 2011 թ. մարտից շարունակվող Սիրիայի հակամարտության լուծման ոչ մի նոր առաջարկ չեն ներկայացրել:
Ըստ Բրահիմիի՝ իրենք մեկ անգամ ևս հաստատել են, որ հակամարտությունը չի կարող ռազմական ճանապարհով լուծվել: Նա ասել է, որ իրենք ընդգծել են հակամարտության` քաղաքական ճանապարհով լուծմանը հասնելու անհրաժեշտությունը, որը հիմնված կլինի 2012 թ. հունիսի 30-ի Ժնևյան հայտարարության վրա: Այս փաստաթղթի հիմնական տարրը ղեկավարող մարմինն է, որը պարտավոր է բոլոր առումներով իրականացնել գործողությունները:
Բրահմին նաև խոստովանել է, որ դեռևս հեռու է հակամարտության լուծման օրը: Նա նշել է, որ բանակցության մասնակիցները բոլորն էլ շահագրգռված են հակամարտության խաղաղ ճանապարհով լուծման ուղին գտնելու հարցում:
Բրահիմին ասել է, որ մտադիր է ՄԱԿ-ի Անվտանգության խորհրդում ճեպազրույց ունենալ` ներկայացնելով իր կողմից Դամասկոսում սիրիական կողմի հետ ունեցած հանդիպումների և գործադրած ջանքերի մասին
Բանակցությունների շարունակման համար նախատեսված նոր հանդիպման ժամկետների մասին դեռևս տեղեկություն չկա:
Բոգդանովն ու Բերնսը մեկնաբանություններ անելուց զերծ են մնացել:
ՄԱԿ-ն անցյալ շաբաթ նոր տեղեկություններ էր հրապարակել Սիրիայի զոհերի մասին, որի համաձայն արդեն 59,648 մարդ զոհվել է: Ավելի քան 5 մլն բնակիչ հումանիտար օգնության կարիք ունի: Փախստականների թիվը հասնում է 614 հազարի: Մտավախություն կա, որ այս թիվը կհասնի 1 մլն մարդու:
