Միայն քաղաքական կամքը բավարար չէ, Վրաստանում հայկական եկեղեցիների հարցը պետք է պահել լայն շրջանակների ուշադրության կենտրոնում: Այս մասին այսօր «Առաջին լրատվական»-ի հետ զրույցում ասաց «Բազմազգ Վրաստան» քաղաքացիական շարժման նախագահ Առնոլդ Ստեփանյանն՝ անդրադառնալով Վրաստանում հայկական եկեղեցիների խնդրին:
Նա նշեց, որ, ամենայն հավանականությամբ, առաջիկայում քննարկումներ պետք է կազմակերպել հանրային և քաղաքական սեկտորի ներկայացուցիչների հետ: «Կան տարբեր քաղաքական կուսակցություններ և հանրային սեկտորի ներկայացուցիչներ, որոնք կարող են տարբեր դիրքորոշումներ ունենալ այս հարցի վերաբերյալ: «Միացյալ ազգային շարժում»-ը տարիներ առաջ ասում էր, որ հետևողական կլինի Վրաստանում հայկական եկեղեցիների հարցով, այժմյան ընդդիմադիրներն ասում էին այս մասին, սակայն ոչ մի քայլ չարեցին: Կարևոր է, որ նման խոսակցությունները տեխնիկական չլինեն, այլ առարկայական, որին հասնելու համար հարցը պետք է պահել հասարակության լայն շերտերի ուշադրության կենտրոնում»,- նշեց Առնոլդ Ստեփանյանը:
Հիշեցնենք, որ տարեսկզբին Վրաստանի վարչապետ Բիձինա Իվանիշվիլին Վրաստանի հայ համայնքի մի քանի ներկայացուցիչների հետ ոչ պաշտոնական հանդիպման ժամանակ անդրադարձել էր Վրաստանում հայկական եկեղեցիների հարցին: Հայ համայնքի ներկայացուցիչները հետաքրքրվել էին, թե ինչպես պետք է լուծվի Վրաստանում հայկական եկեղեցիների հարցը: Ըստ Ա. Ստեփանյանի՝ պատասխանը եղել էր այն, որ պետք չէ վախենալ և դրա մասին անհարաժեշտ է բարձրաձայն խոսել, քանի որ դա Վրաստանի համար կարևոր թեմա է և հանրայնացման կարիք ունի, և քանի որ հանրային հետաքրքրություն կա, պետք է կոմպրոմիսների գնալ: «Նա նաև ընդգծել է, որ հայկական համայնքը վրաց հասարակության անբաժանելի մասն է, որ պետք է հաշվի առնել հայ համայնքի պոտենցիալը Վրաստանը կառուցելու գործում»,- ասաց Առնոլդ Ստեփանյանը:
