Հետտոնական սթրեսը պետք է հաղթահարել՝ մի վիճակից մյուս վիճակին անցումն աստիճանաբար իրականացնելով: Այսօր ԵՊՀ ընդհանուր հոգեբանության ամբիոնի վարիչ Հրանտ Ավանեսյանը և ԵՊՀ սոցիոլոգիայի ամբիոնի վարիչ Արթուր Աթանեսյանը խոսեցին հետամանորյա սթրեսները հաղթահարելու մասին։ Հրանտ Ավանեսյանն ասաց, որ նախատոնական տրամադրությունները անհանգստությունների, տագնապայնության հետ են կապված՝ «ինչ են ուտելու», «ինչ ծախս են անելու», «ում հետ են անցկացնելու», «ինչ են հանգնելու», հետո «ինչպես են հոգալու ծախսերը»: Սակայն, ըստ բանախոսի, տոնից պետք է սպասել տոն, ուրախություն, հետաքրքիր շփումներ, հատուկ կազմակերպված միջոցառումներ՝ այնուհետև մի վիճակից մյուսն անցնել աստիճանաբար: «Սրանք ապահովելու դեպքում տոնը բացասական տրամադրություններ չի բերի»,- վստահեցրեց նա: Ոչ մի գործողությունից մյուսը կտրուկ չի կարելի անցնել, այլ աստիճանաբար:
Արթուր Աթանեսյանն ասաց, որ մարդիկ հիմնականում հոռետեսորեն են տրամադրվում, որ կծախսեն գումարներ, սակայն կանեն այն, ինչ ամեն տարի, և որևէ նոր բան չի լինի: Բանախոսի մի շարք դիտարկումների արդյունքում պարզ է դարձել, որ շատերը տոնական ծախսերը պարզապես ստիպված են արել՝ փորձելով հնարավորինս փոքր միջոցներով ապահովել տոնական սեղանի ցուցադրական մասը: Ըստ նրա՝ այս փոփոխությունը նկատվել է այս տարի, նաև այն, որ ավելի քիչ մարդիկ են այցելել միմյանց:
«Դա ստուգելու համար ես տաքսիստների հետ եմ զրուցել, իրենք ասել են, որ շատ ավելի քիչ մարդ են տեղափոխել տոնական օրերին, շատ երկար ժամանակ պարապ մնացել և շատ ավելի քիչ գումար աշխատել այս տարի հունվարի 1-ին, քան նախորդ տարի»,- ներկայացրեց իր ուսումնասիրության արդյունքներն Արթուր Աթանեսյանը՝ շարունակելով, թե սա չի նշանակում, որ ազգն ավելի տխուր է դարձել:
Նրա համոզմամբ՝ միտում է նկատվում, որ կորպորատիվ միջոցառումների են հաճախ մասնակցել նախատոնական գիշերը՝ վերջակետ դնելով պարտադիր մի շարք հանգամանքների:
