Ֆրանսիայի Սոցիալիստական կուսակցությունը հրաժարվել է ամուսնական իրավահավասարության մասին կառավարական օրինագծում միասեռ զույգերի արհեստական բեղմնավորման օրինականացմանն ուղղված փոփոխություններից,- հաղորդում է Rosbalt-ը:
Սոցիալիստական կուսակցությունը հունվարի 9-ին հայտարարել է, որ չի առաջարկի փոփոխություն, որը լեսբուհի զուգերին թույլ կտար արհեստական բեղմնավորման ճանապարհով երեխաներ ունենալ: Հրաժարվելու մասին բարձրաձայնվել է հունվարի 13-ին ծրագրված միասեռ ամուսնությունների օրնականացման դեմ զանգվածային բողոքի ցույցից առաջ, որը տեղի կունենա Փարիզում:
Միասեռականների իրավունքների պաշտպան ֆրանսիական խմբերն իրենց հիասթափությունն են հայտնել այս առիթով:
Հասարակական հարցման արդյունքներով՝ ֆրանսիացիների 60%-ը կողմ է միասեռ ամուսնություններին, 46%-ը՝ որ լեսբուհիներն իրավունք ունենան արհեստական բեղմնավորման միջոցով երեխա ունենալ:
Հիշեցնենք՝ դեկտեմբերի 16-ին սեռական փոքրամասնությունների շահերի պաշտպան հազարավոր ակտիվիստներ դուրս էին եկել Ֆրանսիայի խոշորագույն քաղաքների փողոցներ: Ցուցարարաները հանդես են եկել պատրաստվող օրինագծի օգտին, որը պետք է միսեռ զույգերին թույլ տա գրանցել ամուսնությունն ու օրինականորեն երեխա որդեգրել:
Հունվարի 29-ին օրենքի նախագիծը պետք է դրվի խորհրդարանի քննարկմանը: