Իսրայելի նախագահ Շիմոն Պերեսը հայտարարել է, որ Թել Ավիվին չի կարելի կորցնել Վաշինգտոնի աջակցությունը, քանի որ այդ պարագայում իրենք չեն կարող պաշտպանել սեփական շահերը:
«Մենք չպետք է կորցնենք ԱՄՆ աջակցությունը: Հենց նա է մեզ հնարավորություն ընձեռում պաշտպանել մեր շահերը: Եթե Իսրայելը մենակ մնա, նրան թշնամիները կուլ կտան»,- The New York Times–ին տված հարցազրույցում ասել է Իսրայելի նախագահը:
Նրա խոսքերով՝ առանց ԱՄՆ աջակցության Իսրայելը «անապատում միայնակ ծառ կլինի»: Այսպես է Պերեսը մեկնաբանել ԶԼՄ-ների այն տեղեկությունները, ըստ որոնց ԱՄՆ նախագահ Օբաման և Իսրայելի վարչապետ Նեթանյահուն միմյանց նկատմամբ հակակրանք են տածում:
Իսրայելական ԶԼՄ-ները տեղեկություններ էին տարածել, թե ԱՄՆ նախագահը կփորձի վրեժ լուծել Նեթանյահուից այն բանի համար, որ ԱՄՆ նախագահական ընտրությունների ժամանակ վերջինս պաշտպանում էր հանրապետական թեկնածուին: Едиот ахронот-ը գրել էր. «Նեթանյահուն խաղադրույք է կատարել, իսկ մենք պետք է վճարենք պարտվածի փոխարեն»:
«Այժմ Օբաման 4 տարի ունի Նեթանյահուի հետ հաշիվները մաքրելու համար` իր կողմից հանրապետական թեկնածուին բացահայտ աջակցելու, կոնգրեսականների առաջ Օբամայի վարկանիշի իջեցման, պաղեստինցիների հետ բանակցությունների կասեցման, պաղեստինյան տարածքներում բնակավայրերի կառուցման, ինչպես նաև իրանական հարցում Օբամային լիդերության դասեր տալու համար»,- գրում է պարբերականը:
Օբամայի կառավարման առաջին ժամանակահատվածում Իսրայելի վարչապետի հետ հարաբերությունները լարված էին:
