Նախկինում իր թեկնածությունն առաջադրելու մասին հայտարարած ԲՀԿ-ական Ռուբեն Այվազյանն «Առաջին լրատվական»-ի հետ զրույցում նշեց, որ այն լուրերը, թե ԲՀԿ-ում իրեն խնդրել կամ ստիպել են հանել իր թեկնածությունը, իրականությանը չեն համապատասխանում։
«Խնդրանք կամ պարտադրանք չի եղել, ուղղակի հորդորել են ինձ հաշվի առնել այն հանգմանքը, որ ներկա կեղծված տեղեկատվությունը հասարակության մոտ այնպիսի տպավորություն է ստեղծում, որ ես իբր խախտում եմ ԲՀԿ կանոնադրությունը և քաղաքական խորհրդի որոշումը: Ի վերջո, քանի որ հանդիպումը տեղի էր ունեցել իմ խնդրանքով, իմ կուսակից ընկերները վերջնական որոշումը թողեցին իմ վրա: Իսկ ես չեմ կարող թույլ տալ, որ լրատվամիջոցների կողմից իմ առաջադրման հարցը օգտագործվի ընդդեմ իմ կուսակից ընկերների»,- ասաց Ռուբեն Այվազյանը։
Նա թեև անուններ չցանկացավ նշել, բայց ասաց որ ինքն է զանգահարել իր ԲՀԿ-ական ընկերներին, խնդրել հանդիպել, քանի որ իրեն ակնարկներ էին հասել, որ որոշ լրատվամիջոցներ փորձում են իր առաջադրումը կապել նրա հետ, թե իբր ինքը չի ենթարկվում ԲՀԿ կանոնադրությանը և քաղաքական խորհրդի որոշմանը:
