Վերջին ամիսների ընթացքում ԱՄՆ բանկերի վրա ցանցահենային մի շարք հարձակումների հետևում կանգնած են իրանցի ցանցահենները: Այս մասին The New York Times-ին հայտարարել է Ջեյմս Լյուիսը, որն աշխատում է Ռազմավարական և միջազգային հետազոտությունների կենտրոնում (CSIS):
Լյուիսի խոսքերով՝ «ԱՄՆ կառավարությունը կասկածներ չունի, որ այս հարձակումների հետևում կանգնած է Իրանը»:
Ինչպես նշում է թերթը, Վաշինգտոնը որևէ տեխնիկական ապացույց չի ներկայացրել, որ բանկերի վրա ցանցահենային հարձակումներն իրականում կազմակերպել է Թեհրանը:
Չարագործների նպատակն է եղել խախտել բանկերի կայքերի աշխատանքները, այլ ոչ թե գումար գողանալ: Փորձագետների կարծիքով՝ դա վկայում է այն մասին, որ Իրանի իշխանությունները առնչություն ունեն հարձակումների հետ:
ԱՄՆ բանկերի վրա DdoS հարձակումների շարքը սկսվել է 2012թ. սեպտեմբերին: Ցանցահենների հարձակման զոհ են դարձել Bank of America-ն, Citigroup-ը, Wells Fargo-ն, U.S. Bancorp-ը և հինգ այլ կազմակերպություններ:
