Շաբաթներ առաջ ՀՀ նախագահական ընտրություններին ընդառաջ ՀՀ-ում իրավիճակը կարելի էր համարել հուսահատական, սակայն հիմա արդեն հետաքրքրական ժամանակների փուլ ենք մտել. այսօր լրագրողների հետ հանդիպման ժամանակ այս մասին ասաց ԱԻՄ ղեկավար, ՀՀ նախագահի թեկնածու Պարույր Հայրիկյանը:
Նա նշեց, որ ինքն ու իր թիմակիցները մեկ առավելություն ունեն՝ անցած ճանապարհ: Նա նկատեց, որ նույնիսկ իր մասին քննադատական հոդվածները սկսում են՝ ՀՀ մեծագույն ձեռքբերումները կապելով իր անձի հետ, բայց սանրվածքը լավը չէ և այլն: Ըստ նրա՝ դրանք իրեն դրականորեն են գնահատում:
«Գաղափարախոսական տեսանկյունից մենք մի մեծ առավելություն ունենք, եթե մյուսներն ասում են, թե կտան, մենք ասում ենք, որ կօգնենք իրացնել Աստծու կողմից տրվածը ինքնորոշման իրավունքը, ամենակարևոր բանը, որը մարդը մարդուն կարող է տալ: Մենք ժամանակին սկսել ենք ազատ, անկախ ՀՀ-ի գործնական իրականացումը, հաջողվել է ՀՀ-ն դարձնել անկախ պետություն, բայց, ի վերջո, ՀՀ-ն միջազգային իրավունքին ենթակա է: Բոլորն են խոսում ժողովրդավարության մասին, բայց գաղափարներով հանդես եմ գալիս միայն ես»,- ասաց Պարույր Հայրիկյանհը:
Խոսելով նախագահական ընտրությունների անմրցակցայնության մասին՝ նա ասաց, որ իսկապես մրցակցային տեսանկյունից բարդ ընտրություն է լինելու, քանի որ դժվար է իր դեմ մրցել: Նա հստակեցրեց, որ այս ընտրություններից իր ակնկալիքն այն է, որ, ստանալով բարոյաքաղաքական լծակներ, կարողանա անել տասն անգամ ավելին նրանից, ինչ անում է առանց լծակների:
Անդրադառնալով նախկինում հայտնած իր տեսակետներից մեկին, թե ընտրություններին գումար վերցնողները և բաժանողները ոչխարներ են՝ Հայրիկյանն ասաց, որ սրտանց ներողություն է խնդրել աշխարհի բոլոր ոչխարներից: «Դրամ տվողն ու բաժանողը հայրենիքն է վաճառում, ինչը կնոջը և երեխային վաճառելուց վատ է»,- նկատեց նա:
