Արևմտյան երկրների ղեկավարներն առավել ինտենսիվ բանակցություններ պետք է վարեն Ռուսաստանի հետ ուկրաինական ճգնաժամի վերաբերյալ, և դրանք պետք է անցնեն հավասար պայմաններում: Այս մասին հայտարարել է Եվրոպայի Խորհրդի գլխավոր քարտուղար Թուրբյորն Յագլանդը:
«Միանգամայն ակնհայտ է, որ Մոսկվան ազդեցություն ունի Ուկրաինայի արևելքում տեղի ունեցող իրադարձությունների վրա, և հենց այդ պատճառով Արևմուտքը Ռուսաստանի հետ պետք է խոսի ինչպես հավասարը հավասարի հետ»,- ասել է Յագլանդը, որի խոսքերը մեջբերում է Deutsche Welle-ն:
Եվրոպայի Խորհրդի գլխավոր քարտուղարը դրական է գնահատել Ռուսաստանի և ԱՄՆ-ի արտգործնախարարների հաճախակի դարձած կապերը և կոչ է արել եվրոպական երկրներին ավելացնել դեպի Ուկրաինա ուղարկվող մարդասիրական աջակցությունը:
«Գերմանիան, մարդասիրական շարասյուն ուղարկելով Ուկրաինա, լավ օրինակ է ցույց տվել: Եվրոպական մյուս երկրները պետք է հետևեն նրա օրինակին»,- ասել է Յագլանդը:
Ավելի վաղ հաղորդվում էր, որ Եվրոպայի Խորհրդի գլխավոր քարտուղարը ամենայն հավանականությամբ Մոսկվա կայցելի նոյեմբերի 27-ին:
