«Սարդարապատ» շարժումը կազմակերպել էր քննարկում` «Համակարգային փոփոխություններ. ընտրություններո՞վ, թե՞ ոչ» թեմայով: Քննարկումը թեեւ նախատեսված էր կազմակերպել «Թեքեյան» մշակութային կենտրոնում, սակայն իշխանությունների հրահանգով դահլիճ չէին տրամադրել: Քննարկման նախաձեռնողներից Տիգրան Խզմալյանը տեղեկացրեց, որ «Կենաց տուն» մշակութային կենտրոնում, որտեղ հավաքվել են, նախկինում եղել է Սարդարապատի հերոսներից մեկի` գեներալ Սիլիկյանի տունը: «Ժողովրդավարական հայրենիք» կուսակցության նախագահ Պետրոս Մակեյանը հիշեցրեց, որ մարտիմեկյան դեպքերից հետո վախը ՀՀ իշխանությունների համար «միս ու արյուն» է ձեռք բերել: Պետրոս Մակեյանն անդրադարձավ այն թեմային, թե ինչպես իշխանություններին հաջողվեց ձեւավորել քրեաօլիգարխիկ համակարգ` հասարակությանը դուրս մղելով քաղաքական գործընթացներից: Նա հիշեցրեց, որ 1998 թ. սկսած` իշխող զույգը, հենվելով կրիմինալի վրա եւ նրանց դեմ ունենալով կոմպրոմատներ, օգտագործեց այդ «ռեսուրսը» համապետական ընտրությունների ժամանակ: Հետագայում էլ նրանք դարձան իշխող կլանի հենարանն ու սպասարկուն: Մակեյանն իր ելույթում հիշատակեց նաեւ, որ իշխանությունները իրենց վերարտադրությունն ապահովելու համար օգտագործեցին եվրոպական նիստ ու կացով կարիերիստ երիտասարդների: Նա նրանց անվանեց անհայրենիք կոսմոպոլիտ երիտասարդներ: Մակեյանը կարծում է, որ ընդդիմության հետեւողական քայլերը պետք է հասցնեն այն բանին, որ վարչախումբը հրաժարական տա, եւ կայանան ՀՀ Նախագահի արտահերթ ընտրություններ: Պետրոս Մակեյանը կարծիք հայտնեց, որ եթե տեղի ունենան ԱԺ արտահերթ ընտրություններ, վարչախումբը դիմելու է նույն ընտրակեղծիքների մեթոդին: