1962-ի հոկտեմբերին Մեծ Բրիտանիան և Ֆրանսիան գերձայնային մարդատար ինքնաթիռ ստեղծելու համաձայնագիր են կնքել: 1969-ի հունվարի 9-ին իրականացվել է «Կոնկորդ» ինքնաթիռի առաջին փորձնական թռիչքը:
Առաջին սերիական արտադրանքը` 16 «Կոնկորդները», արտադրվել է Ֆրանսիայի Թուլուզ քաղաքում` 1962-ի դեկտեմբերին: 1976-ից սկսվել են «Կոնկորդ» ինքնաթիռների մշտական թռիչքները: Անգլիան գործարկել է 5 ինքնաթիռ, Ֆրանսիան՝ 4: Այդ դասի գերձայնային ինքնաթիռները կիրառվել են 27 տարի և բավական ընդունված են եղել:
Այդ ընթացքում «Կոնկորդը» արագության մի քանի ռեկորդ է սահմանել, օրինակ՝ Լոնդոնից Նյու Յորք այն թռչել է 2 ժամ 55 րոպե 15 վայրկյանում, իսկ Երկրագնդի շուրջը պտտվել է 31 ժամ 27 րոպե 49 վայրկյանում՝ 6 անգամ վայրէջք կատարելով վառելիքի վերալիցքավորման համար: Այդ թռիչքի ժամանակ ինքնաթիռում 99 ուղևոր, անձնակազմի 18 անդամ և փոքրիկ արջ է եղել:
Գրեթե 30 տարվա ընթացքում այդ ինքնաթիռներով տեղափոխվել է ավելի քան 3 մլն ուղևոր, ինքնաթիռների թռիչքի ընդհանուր ժամանակը կազմել է մոտ 250 000 ժամ: Չափազանց մեծ ծախսերի պատճառով «Կոնկորդը» գործարկումից հանվել է 2003-ին: Դրան նպաստել է նաև 2000-ի հուլիսի 25-ին տեղի ունեցած վթարը, երբ ինքնաթիռներից մեկը Փարիզի «Շառլ դո Գոլ» օդանավակայանից թռչելիս վթարվել էր. զոհվել էր 113 մարդ:
