ԱՄՆ-ի իշխանությունները 2012-ին 18 մլրդ դոլար են ծախսել՝ երկրում ներգաղթի ռեժիմի խստացման համար։ Այսպիսի տվյալներ են հրապարակվել Migration Policy Institute (MPI) հաշվետվությունում։
Ըստ հանրայնացված տվյալների՝ ներգաղթողների մասին օրենքների կարգավորման վրա կատարված ծախսերն անցյալ տարի հասել են ռեկորդային չափերի, որոնք գերազանցել են բոլոր այլ ոլորտների օրենքների վրա կատարված գումարային ծախսերը։
2012-ին Ներքին անվտանգության դեպարտամենտն ավել շատ գործեր է դատական ատյաններին ներկայացրել, քան ՀՖԲ-ն, Թմրամիջոցների անօրինական շրջանառությունը վերահսկող գործակալությունը կամ Ալկոհոլի, ծխախոտի, զենք-զինամթերքի վերահսկման բյուրոն։ Այդ բոլոր գերատեսչությունների բյուջեների գումարը, միասին վերցրած, կազմել է 14 մլրդ դոլար։
Հաշվետվությունում նշված է, որ ԱՄՆ ներգաղթողների վրա վերահսկողության ծախսերը 1986-ից այս կողմ աճել են 15 անգամ։ Ըստ հաշվետվության հեղինակի՝ այդ օրենքների խստացման նախաձեռնությամբ հանդես են եկել հանրապետականները։ Վերջիններս առաջարկել են, որ ներգաղթի միջոցառումների առաջին քայլը պետք է լինի օրենքների խստացումը, այնուհետև պետք է զբաղվել ԱՄՆ-ում գտնվող 11 մլն ներգաղթյալների կարգավիճակի հարցերով։
