Աշխարհի ամենահարուստ մարդկանցից մեկը՝ Continental Resources-ի հիմնադիր և գլխավոր տնօրեն Հարոլդ Համը, մոտ 1 մլրդ դոլար կվճարի իր նախկին կնոջը, գրում է Forbes-ը: Զույգի բաժանության գործը վարող դատարանը վճռել է, որ Համն իր նախկին կնոջը՝ Սյու Էնն Համին, պետք է 995,5 մլն դոլար վճարի:
Դատարանի որոշմամբ՝ միլիարդատերը պետք է մինչև այս տարվա վերջ վճարի 320 մլն դոլար, իսկ մնացած գումարը պետք է բաժանի վճարումների, որոնց չափը պետք է լինի ամսական առնվազն 7 մլն դոլար: Դատարանը նաև հաստատել է Continental-ում Համի 20 մլն բաժնետոմսերի գրավադրումը, որոնց արժեքը գնահատվում է ավելի քան 1 մլրդ դոլար:
«Սովորաբար 26 տարվա ամուսնությունից հետո կինը կարող է հավակնել ամուսինների ընդհանուր կարողության առնվազն 25-30%-ը: Այդ դեպքում նա մոտեցել է 7% ստանալուն»,- պարբերականին հայտնել է բաժանության հարցերով փաստաբան Սեյմուր Ռեյսմանը:
«Դա գործի ազնիվ և արդար ելք է: Իմ ընտանիքի հանդեպ հարգանքից ելնելով՝ մենք այլևս չենք մեկնաբանի այդ հարցը»,- ասվում է Համի հայտարարության մեջ:
The New York Times-ը նշում է, որ ձեռնարկատիրոջ ունեցվածքը գնահատվում է ավելի քան 18 մլրդ դոլար:
