«Ես գտնում եմ, որ Միհրան Պողոսյանի քայլը սխալ է, ինքը պետք է հետ ուզի էդ գործը, որովհետև էդտեղ ոչ մի քրեական գործ չկա»,- «Առաջին լրատվականի» հետ զրույցում ասաց գործարար Սիլվա Համբարձումյանը՝ պատասխանելով հարցին, թե ինչպես է գնահատում Միհրան Պողոսյանի քայլը, որը իր տան հարկադիր աճուրդի գործով դիմել է քննչական կոմիտե:
Ինչպես հայտնի է՝ ԴԱՀԿ ծառայությունը հարկադիր էլեկտրոնային աճուրդի է ներկայացրել պարտապան Սիլվա Համբարձումյանին պատկանող, Երևանի Երզնկյան փողոցում գտնվող տունը: Հարկադիր էլեկտրոնային աճուրդում հաղթող ճանաչված քաղաքացու կողմից ԴԱՀԿ ապահովող ծառայություն է ներկայացրել «Անելիք բանկ» ՓԲԸ-ի կողմից տրված վճարման հանձնարարագրի պատճենը, համաձայն որի՝ աճուրդում հաղթողը վճարել է աճուրդով ձեռք բերած գույքի գումարը՝ 40 մլն 198 հազար դրամ: Վճարման հանձնարարագրի իսկությունը հաստատելու համար ծառայությունը դիմել է «Անելիք բանկ» ՓԲԸ-ին, որն ի պատասխան հայտնել է, որ նման վճարման հանձնարարագիր չի կազմվել, և ներկայացված հանձնարարագրում արտացոլված դրոշմակնիքը չի համապատասխանում բանկի դրոշմակնիքին:
Հաշվի առնելով, որ վերը նշված գործողություններում կարող են պարունակվել ՀՀ Քրեական օրենսգրքով նախատեսված հանցակազմի հատկանիշներ, ՀՀ գլխավոր հարկադիր կատարող Միհրան Պողոսյանի համապատասխան գրությամբ կատարողական վարույթից նյութեր են ուղարկվել ՀՀ քննչական կոմիտե վերը նշվածին քրեաիրավական գնահատական տալու համար:
«Ես ինչ իմանամ, գնորդն ով ա: Իրենց կասիրը տվել է ոչ ճիշտ հաշվի համար, փոխանցումը գնացել է ոչ ճիշտ հաշվի վրա, երբ որ նոտարն էլ է ձևակերպել, որ պիտի գնար կադաստր, տեսել են, որ իրանց հաշվի վրա չի: Հետո փոխվել է իրենց հաշվի վրա, և մինչև էսօր էլ փողն իրանց հաշվի վրա է: Եթե անգամ ուղարկեն էլ, էդտեղ ոչ մի քրեական գործ չկա: Ոչ մի մտավախություն չունեմ: Եթե իմ գույքն ինձ պիտանի լիներ, ես այն ինքս կառնեի»,- «Առաջին լրատվականի» հետ զրույցում հայտարարեց գործարար տիկինը:
Մեր հարցին, թե ճի՞շտ է, որ իր բարեկամն է գնել տունը, պատասխանեց. «Ոչ, Չեխիայից մեկն է գնել, և նա կապ չունի ինձ հետ, և էդ վճարման հանձնարարագիրն էլ «Անելիք»-ի հանձնարարագիր է: Ինձ հետ կապված ոչինչ չկա»:
Սիլվա Համբարձումյանը չի կարծում, որ սա քննչական կոմիտե ուղղարկելու գործ էր: «Ի՞նչ նպատակ է հետապնդում այդ քայլը» հարցին ի պատասխան նա ասաց. «Դե, ես հայտարարեցի, որ գարնանը մտնում եմ քաղաքականության մեջ: Ինձ հարց տվեցին՝ Եռյակի՞ հետ, թե՞ առանձին, ես ասացի՝ կսպասեմ, Եռյակը մինչև գարուն տեսնեմ՝ ինչ ընթացք կունենա, եթե գաղափարական գծով ինձ համապատասխանում է՝ կմիանամ, եթե ոչ, մի հատ կուսակցություն կբացեմ: Երևի դա պետք էր»:
Մեր հարցին ի պատասխան, թե կարծում է՝ կուսակցություն բացելն այդքան հե՞շտ է, ինքը քաղաքական կուսակցություն կարո՞ղ է բացել, Սիլվա Համբարձումյանը հայտարարեց. «Իսկ ինչու ոչ, ինչու ոչ»: Երբ հարցինք, թե ի՞նչ գաղափարախոսության շուրջ է բացելու կուսակցությունը, ի՞նչ գաղափարներ է այն կրելու՝ պատասխանեց, որ շուտով մամլո ասուլիսով կհայտարարի այդ մասին: