Վրաստանի «Վրացական երազանք» կոալիցիան իր կազմից «Ազատ դեմոկրատների» դուրս գալուց հետո ոչ միայն չի զրկվի մեծամասնությունից, այլև ընդհակառակը՝ իր թվաքանակը խորհրդարանում կավելացնի՝ 83-ից հասնելով 87-ի: Այս մասին լույս երկուշաբթի գիշերը հայտնել է «Ռուսթավի-2» հեռուստաալիքը:
Վրաստանի խորհրդարանում կա 150 աթոռ, իշխող «Վրացական երազանքը» զբաղեցրել է դրանցից 83-ը: Սակայն «Մեր Վրաստան-ազատ դեմոկրատներ» կուսակցությունը հայտարարել է իշխող կոալիցիայից դուրս գալու և ընդդիմադիր դառնալու մասին, երբ երկրի վարչապետ Իրակլի Ղարիբաշվիլին պաշտպանության նախարարի պաշտոնից հեռացրեց կուսակցության ղեկավար Իրակլի Ալասանիային: Ալասանիայի կուսակցությունը խորհրդարան է տարել 10 պատգամավոր, ուստի նրանց դուրս գալուց հետո իշխող կոալիցիայում կմնար 73 խորհրդարանական:
Մեծամասնությունը պահպանելու համար «Վրացական երազանքին» անհրաժեշտ է 76 մանդատ:
Միաժամանակ, միայն 7 «ազատ դեմոկրատ» է համաձայնվել լքել խորհրդարանական մեծամասնության շարքերը: Մյուս կողմից՝ մեծամասնության պատգամավոր Շալվա Շավգուլիձեն տեղափոխվել է «Ազատ դեմոկրատներ» խմբակցություն:
Բյուրոյի նիստից հետո երկուշաբթի օրը 6 անկախ պատգամավոր և մեծամասնականների 6-հոգանոց խմբակցությունը պաշտոնապես միացել է խորհրդարանական մեծամասնությանը»՝ հայտնում է «Ռուսթավի-2»-ը:
Այսպիսով՝ «Վրացական երազանքը» երկրի խորհրդարանում ներկայացված կլինի 87 պատգամավորով, ընդդիմադիր «Միացյալ ազգային շարժումը»՝ 51, Ալասանիայի խմբակցությունը՝ 8 մանդատով, ևս 4 խորհրդարանական կշարունակի գործել որպես անկախ պատգամավոր:
