Վրացական Apsny.ge կայքի փոխանցմամբ, Ջավախքում ու Կվեմո Քարթլիում աճում է վրացերենի իմացության մակարդակը: Այս մասին հայտարարել է Քաղաքացիական զարգացման գործակալության տնօրեն Զվիադ Դևդարիանին:
Վերջինիս խոսքերով, իրենք տվյալ խնդրի շուրջ բազմակողմ հետազոտություններ են անցկացրել և ուսումնասիրել են այդ շրջանների բնակչության խնդիրները, սոցիալ-տնտեսական իրավիճակը և տարբեր ինստիտուտների ու պետական կառույցների նկատմամբ տեղական բնակչության վստահության աստիճանը:
Հետազոտությունները ցույց են տվել, որ ադրբեջանաբնակ Կվեմո Քարթլիի (Բորչալու) ու հայաբնակ Ջավախքի հիմնական խնդիրը գործազրկությունն ու առողջապահությունն է:
Բացի այդ, դրանցում զգալի աճ է արձանագրվել պետական լեզվի իմացության մակարդակի և տարբեր ինստիտուտների հանդեպ տածած վստահության հարցերում:
Դևդարիանին նշել է. «Կարևոր է, որ այդ երկու շրջաններում գնալով ավելի շատ մարդիկ են հայտարարում, որ իրենք կարողանում են միմյանց հետ հաղորդակցվել վրացերենով:
Հետաքրքիր է, որ աճել է պետության հանդեպ վստահությունը:
Տվյալ շրջաններում գոյություն ուներ այն խնդիրը, որ բնակչությունն իրեն ավելի շատ կապված էր զգում այլ երկրների (Հայաստանի ու Ադրբեջանի), քան` Վրաստանի հետ: Այսօր այդ ուղղությամբ առաջընթաց է գրանցվում»:
