«Աստղայաին պատերազմներ»-ի ստեղծող Ջորջ Լուկասը հայտարարել է DreamWorks Animation ընկերության տնօրենների խորհրդի ղեկավար Մելլոդի Հոբսոնի հետ նշանադրության մասին: Այս մասին հաղորդում է The Hollywood Reporter-ը` վկայակոչելով ռեժիսորի պաշտոնական ներկայացուցիչներին:
Չի հայտարարվել, թե երբ է կայանալու Լուկասի և Հոբսոնի հարսանիքը, որոնք հանդիպում են 2006 թվից: 68-ամյա ռեժիսորի համար նախատեսվող հարսանիքը կլինի երկրորդը, իսկ 43-ամյա Հոբսոնը նախկինում ամուսնացած չի եղել:
Հոբսոնը ղեկավարում է ոչ միայն DreamWorks Animation-ի տնօրենների խորհուրդը, այլ նաև Ariel ներդրումային ընկերությունը և հիմնադրամը: Բացի այդ, նա հանդես է գալիս նաև որպես Good Morning America հեռուստահաղորդման տնտեսական փորձագետ, որը թողարկվում է ABC հեռուստաալիքով:
Ջորջ Լուկասին համաշխարհային ճանաչում է բերել «Աստղային պատերազմներ» ֆիլմը: 2012 թ. նա 4.06 միլիարդ դոլարով Lucasfilm Ltd կինոընկերությունը վաճառել է The Walt Disney Company կինոստուդիային: Վաճառքից ստացված գումարը նա մտադիր է նվիրաբերել բարեգործական հիմնադրմաին, որը զբաղվում է կրթության խնդիրներով:
