Իսրայելի վարչապետ Բենիամին Նեթանյահուն շարունակում է անտեսել ԱՄՆ-ի դժգոհությունը` Պաղեստինի հետ կարգավորման Իսրայելի քաղաքականության վերաբերյալ, քանի որ վստահ է երկու պետությունների միջև «ռազմավարական համագործակցության պարադիգմայի» հավերժ տևականության հարցում: Այս մասին Reuters գործակալության համար իր բլոգում գրել է իսրայելցի լրագրող Դիմի Ռեյդերը:
«Ոչ ոքի համար գաղտնիք չէ Օբամայի անձնակազմի «նյարդայնությունը»՝ կապված այն բանի հետ, որ Բենիամին Նեթանյահուն առանձնապես հետաքրքություն չի ցուցաբերում Պաղեստինի հետ հակամարտության կարգավորման և սուննի պետությունների հետ հարաբերությունների բարելավման հարցում: Այսպես, Իսրայելի պաշտպանության նախարար Մոշե Յաալոնը ավելի վաղ «վրդովել» է ԱՄՆ նախագահի մի շարք խորհրդականների` պետքարտուղար Ջոն Քերիի մասին իր արտահայտություններով` նրան կպչուն անվանելով: Ավելին, Իսրայելը շարունակում է սեփական քաղաքականությունը վարել Հորդանան գետի Արևմտյան ափին վերաբնակեցման հարցում` չնայած Վաշինգտոնի քննադատությանը»,- գրել է նյութի հեղինակը:
