Շփացած ճանապարհորդին ժամանակի ընթացքում դադարում են հետաքրքրել միևնույն հյուրանոցները, միանման ծառայությունները: style.rbc.ru-ն առաջարկում է աշխուժացնել հանգիստը ու ինչ-որ նոր բան փորձել: Ձեզ ենք ներկայացնում աշխարհի ամենաէկզոտիկ հյուրանոցները.
Սինգապուրում 1 տարի առաջ սուր զգացողությունների սիրահարների համար բացվել է Marina Bay Sands հյուրանոցը։
200 մետր բարձրությամբ (55 հարկ) 3 աշտարակների վրա տեղակայված է՝ գոնդոլի տեսք ունեցող մեծ ճեմուղի` լողավազաններով ու մինչև 12,4 հազար ք/մ մակերեսով կանաչ այգիներով:
Գլխավոր՝ 150 մետր երկարությամբ լողավազանը, որը տեղակայված է բաց երկնքի տակ, չունի տեսանելի արգելապատնեշներ: Այս իսկ պատճառով այնպիսի տպավորություն է ստեղծվում, թե ջուրը ցած է թափվում բարձրությունից (անվերջ լողավազանի տպավորություն է թողնում): Հյուրանոցն ունի 2500 համար, առևտրային կենտրոն, կոնֆերենս-սրահ, 2 թատրոն, 1 թանգարան ու մի քանի ռեստորան:
Հյուրանոցի կառուցումն արժեցել է 5,7 մլրդ դոլար:
Դուբայի 7-աստղանի հյուրանոցը նախատեսված է նրանց համար, ովքեր կարևորում են հյուրանոցի աստղերի քանակը։ 321 մ բարձրությամբ շինությունը գտնվում է ծովի մեջ՝ ափից 321 մ հեռավորության վրա՝ արհեստական կղզում, որը ցամաքին միացված է կամրջով:
Burj Al Arab-ում չկան սովորական սենյակներ՝ այն բաժանված է 202 երկհարկանի հյուրանոցային համարների: Ամենափոքրն ունի 169, իսկ ամենամեծը՝ 780 ք/մ տարածք: Այն աշխարհի ամենաթանկ հյուրանոցներից է: Սովորական համարում մեկ գիշերվա արժեքը 10 000-15 000 դոլար է, իսկ Royal Suite-ում՝ մոտ 28 000 դոլար:
Հայտնի չէ, թե որքան գումար է ծախսվել հյուրանոցի շինարարության վրա, սակայն բոլոր համարներում կան տեխնիկայի ու դիզայնի ամենավերջին նորույթները, և առաջարկվում է հարմարավետության բարձր մակարդակ: Բոլոր հյուրանոցային համարներն ունեն ծովին նայող, ամբողջ պատով մեկ ձգվող հսկայական պատուհաններ:
Նրանք, ովքեր ցանկանում են ինչ-որ հեքիաթային, կախարդական զգացողություններ ապրել, կարող են գնալ չիլիական Magic Mountain Hotel, որը տեղակայված է լեռնային ջրվեժի տակ:
Այստեղ բավական երկար կախովի կամրջով անցնելիս հնարավոր է նաև ընկնել:
Հյուրանոց-լեռը տեղակայված է Huilo Huilo էկո-շրջանում, որի ավելի քան 100 հա կուսական անտառները գտնվում են ՅՈՒՆԵՍԿՕ-ի կողմից հատուկ պահպանվող շրջանների ցանկում:
Հայտնվելով Ֆլորիդայի Key Largo ակվապարկում 6,5 մետր խորությամբ տեղակայված Jules′ Undersea Lodge ստորջրյա հյուրանոցում՝ կարող եք ձեզ Ժյուլ Վեռնի ստեղծագործությունների հերոս զգալ։
Հյուրանոցում համարները պատվիրվում են 1 ամիս առաջ, քանի որ այն փոքրիկ է՝ ընդամենը 183 ք/մ, և այնտեղ միաժամանակ կարող է հանգստանալ 10-12 մարդ:
Համարում կա ամեն անհրաժեշտ բան՝ օդորակիչ, տաք ջուր, խոհանոց, գրադարան, երաժշտություն լսելու ու ֆիլմեր դիտելու սենյակ:
Մեկ այլ ջրային հյուրանոց՝ Utter Inn-ը, գտնվում է Շվեդիայում՝ Ստոկհոլմից ոչ հեռու՝ Մալարեն լճի վրա:
Դա փոքրիկ կարմիր տնակ է, որը ճոճվում է ջրի վրա: Հանգստացողներին այնտեղ նավակներով են տեղափոխում: Հյուրերը կարող են տաքանալ արևի տակ ու ձկնորսությամբ զբաղվել:
Kadirs Tree House Hotel հյուրանոցում, որը գտնվում է Անթալիայից 1-2 ժամվա հեռավորության վրա, ձեզ կարող եք Տարզան զգալ ու ապրել ծառերի վրա:
Երկտեղանի համարի արժեքն այստեղ 25-30 դոլար է՝ 1 գիշերվա համար:
Գերմանական Շտուտգարտն իր հյուրերին առաջարկում է մնալ թեմատիկ ավտոմոբիլային V8 հյուրանոցում, որն ունի 34 համար՝ յուրաքանչյուրը պատրաստված և կահավորված այնպես, որ ամեն մի դետալն ավտոմեքենա է հիշեցնում: Երկտեղանոց մահճակալները ևս մեքենայի տեսք ունեն:
Եվրոպայի ամենայուրօրինակ հյուրանոցը գտնվում է Բեռլինում: Propeller Island-ը գերմանացի երաժիշտ, նկարիչ Լարս Ստրոշենի ու նրա համախոհների երևակայության արդյունքն է:
Այստեղ համարներում պատերի ու առաստաղի ոչ մի համադրություն պահպանված չէ, դրանց գումարած տարատեսակ հայելիները: Հյուրանոցն ունի ընդամեը 30 սենյակ:
