ԱԺ սոցիալական հարցերի մշտական հանձնաժողովի կողմից «Ժամանակավոր անաշխատունակության նպաստների մասին» ՀՀ օրենքում լրացումներ և փոփոխություններ կատարելու մասին», «Պետական նպաստների մասին» ՀՀ օրենքում փոփոխություններ կատարելու մասին», «Եկամտային հարկի մասին» ՀՀ օրենքում փոփոխություն կատարելու մասին» օրենսդրական փաթեթը քննարկելու նպատակով այս պահին ընթանում են խորհրդարանական լսումներ:
ԲՀԿ պատգամավոր Էլինար Վարդանյանը իր մտահոգությունը հայտնեց այն առնչությամբ, որ ՀՀ-ում երբ խնդիրներ ենք ունենում, փորձում ենք օրենքները հարմարեցնել վարչարարությանը:
«Հիմա չեն կարողանում վերահսկել պետության ծախսերը՝ նպաստների հետ կապված, փորձում ենք վերաձևել օրենքը և պարտավորությունները դնել աշխատող կանանց վրա՝ սահմանափակումներ մտցնելով և ինչ-որ տոկոսային հարաբերություններ սահմանելով: Դուք հղում եք կատարում եվրոպական երկրներին, թե այնտեղ երեսուն-քառասուն տոկոս է, բայց տարբեր եվրոպական երկրներ այս պահի դրությամբ չունեն արտագաղթի այն տեմպերը, որ այսօր ունի ՀՀ-ն: Եվ այժմ փորձել հիասթափեցնել այսօրվա և վաղվա մայրերին, ինչ-որ կերպ փորձել լուծում տալ՝ անընդունելի է»,- ասաց նա:
Նրա խոսքով՝ իրականում նպաստները ուղղված չեն ծնելիության աճին, այլ ուղղված են դրա մակարդակի պահպանմանը:
ՀՀ աշխատանքի և սոցիալական հարցերի նախարար Արտեմ Ասատրյանը դիտարկմանն ի պատասխան՝ նշեց, որ ոչ թե օրենքները փորձում են հարմարեցնել վարչարարությանը, այլ ուզում են առաջացած խնդիրներին օրենսդրական լուծումներ տալ:
Ինչ վերաբերում է ծնելիության խթանմանը, ժողովրդագրական խնդիրների լուծմանը, նախարարը հավելեց, որ դրա խթանման համար մշակվեց ծնելիության միանվագ նպաստ՝ երրորդ և չորրորդ երեխաների դեպքում վճարվում է մեկ միլիոն դրամ:
