ՄԱԿ-ում և Արաբական պետությունների լիգայում Սիրիայի հարցով հատուկ ներկայացուցիչ Լահդար Բրահիմիի հետ շաբաթ օրը կայացած բանակցությունների ժամանակ Ռուսաստանի արտաքին գործերի նախարար Սերգեյ Լավրովն ասել է, որ Մոսկվան համագործակցելու է Սիրիայի բոլոր ընդդիմադիր ուժերի ներկայացուցիչների հետ:
Նա ասել է, որ Ռուսաստանը կապ է պահպանում սիրիական բոլոր ուժերի հետ՝ առանց որևէ բացառության:
Լավրովը նշել է, որ իրենք բաց են ցանկացած մակարդակում նման կապերի շարունակականության համար, որոնց ժամանակ առավել հասկանալի կդառնա Ռուսաստանի դերակատարությունը, քանի որ այդ դերակատարությունը սխալ մեկնաբանելու միտում կա:
Լավրովն ընդգծել է, որ Սիրիայում քաղաքական կարգավորման հնարավորությունը դեռևս պահպանվում է, չնայած շարունակվում են ռազմական գործողությունները: Մեծանում է զոհերի թիվը:
Ռուս նախարարը ավելացրել է, որ քաղաքական կարգավորման հիմքը հունիսի 30-ի Ժնևյան կոմյունիկեն է, որը նախատեսում է անցումային կառավարության ձևավորում, որն էլ պետք է որոշի Սիրիայի քաղաքական համակարգը պատերազմից հետո:
Բրահիմին հանդիպման ժամանակ հայտարարել է, որ չի բացառվում Ժնևյան այդ փաստաթղթում որոշակի շտկումների կատարումը: Նա նշել է, որ փաստաթուղթը Սիրիայի հարցում մեծ ձեռքբերում է, որին հասել են Քոֆի Անանի և Լավրովի, ինչպես նաև Հիլարի Քլինթոնի և այլ բանակցողների ջանքերի շնորհիվ: Նաև նշել է, որ այն լավ հնարավորություն է քաղաքական գործընթացի շարունակության համար:
