Պաղեստինյան ինքնավարության ղեկավար Մահմուդ Աբասը սպառնացել է Իսրայելի վարչապետ Բենիամին Նեթանյահուին լուծարել ինքնավարությունը, եթե Իսրայելը բանակցություններ չսկսի պաղեստինցիների հետ:
«Եթե Իսրայելի ընտրություններից հետո բանակցություններում ոչ մի առաջընթաց չգրանցվի, ես կզանգահարեմ Նեթանյահուին և կասեմ. «Թանկագի´ն ընկեր Նեթանյահու, զբաղեցրո´ւ իմ տեղը: Այժմ հենց դու պետք է պատասխանատվություն կրես պաղեստինյան ինքնավարության համար»»,- իսրայելական «Հաարեց» թերթին տված հարցազրույցում հայտնել է Աբասը:
Նա ընդգծել է, որ Թել Ավիվի հետ երկխոսության վերսկսման անիրականանալի պայմաններ չի առաջադրի:
«Բանակցությունների ժամանակ ես ընդամենը Նեթանյահուին կխնդրեմ բնակավայր չկառուցել (պաղեստինյան տարածքներում-1in.am)»,- ասել է Աբասը:
Աբասը նշել է, որ չի պատրաստվում Իսրայելի դեմ հայցեր ուղարկել Միջազգային քրեական դատարան, քանի դեռ պաղեստինա-իսրայելական հակամարտության դիվանագիտական լուծում գտնելու հնարավորություն կա: Միաժամանակ նա նախազգուշացրել է, որ կփոխի իր դիրքորոշումը այդ հարցի վերաբերյալ, եթե Իսրայելը հետաքրքրություն չցուցաբերի պաղեստինցիների հետ հակամարտության խաղաղ կարգավորման հարցում:
Իսրայելի խորհրդարանական ընտրությունները նշանակված են 2013 թվականի հունվարի 22-ին:
Ըստ հարցումների՝ Նեթանյահուն հավանաբար կպահպանի պաշտոնը:
