ԱՄՆ նախկին նախագահ Ջորջ Բուշ-ավագի վիճակը վատացել է, նա ինտենսիվ թերապիայի պալատում է։ Այս մասին լրագրողներին հայտնել է նախկին նախագահի ներկայացուցիչ Ջիմ Մաքգրան,- հայտնում է RIA Novosti-ն:
Բուշ-ավագը հիվանդանոց է տեղափոխվել նոյեմբերի 23-ին բրոնխիտից բուժվելու համար: Բժիշկները նախատեսել էին նրան դուրս գրել դեկտեմբերի սկզբին, սակայն չեն կարողացել հիվանդի դանդաղ վերականգնման պատճառով: Նախօրեին Բուշի ներկայացուցիչը հայտարարել է, որ նախկին նախագահի վիճակը որոշակի բարելավումից հետո նորից վատացել է:
«Ներկայումս վիճակը չի լավացել… նա Հյուսթոնի հիվանդանոցի ինտենսիվ թերապիայի պալատում է: Ինչ-որ իմաստով, նորությունների բացակայություն արդեն լավ նորություն է»,- Մաքգրայի խոսքերն են մեջբերում տեղի ԶԼՄ-ները:
Վերջին օրերին բարձրացել է Բուշ-ավագի ջերմությունը: Բժիշկները նրա համար բուժման համալիր են մշակել ու դիետա նշանակել: 88-ամյա նախկին նախագահը նաև տառապում է Պարկինսոնի հիվանդությամբ, ինչի պատճառով սայլակով է տեղաշարժվում: