«Հայաստանում ստեղծված նախընտրական ներկա իրավիճակը խոսում է չկայացած քաղաքական համակարգի և պետականության մասին»,– «Երկիր Մեդիա» հեռուստաընկերության «Երկրի հարցը» հաղորդման եթերում ասել է քաղաքական և ընտրական տեխնլոգիաների փորձագետ Արմեն Բադալյանը: Նրա խոսքերով՝ վերջին 20 տարիներին հասարակությունը չի կարողացել իր քվեով իշխանություն ձևավորել, և միայն 1999 թվականի խորհրդարանական ընտրությունների արդյունքներն են եղել ընդունելի: «Այլ դեպքում անվստահություն կա, որը հասարակության մեջ գիտակցության փոփոխությունների է բերում, և մտածում է գնալու մասին: Եթե հասարակությունը չի ձևավորում իշխանություն, ձևավորում են ուրիշները, մեծանում են աշխարհաքաղաքական գործոնների դերը»,- ասել է փորձագետը:
Եթե ԲՀԿ-ն մասնակցեր նախագահական ընտրություններին, ապա, Արմեն Բադալյանի խոսքերով, կպարտվեր` անկախ նրանից` ՀԱԿ-ը կմիանար նրան, թե ոչ: Ապա Սերժ Սարգսյանի հետագա քայլերի համար դա կլիներ «կանաչ լույս»: «Կա՛մ դու գնում ես պարտվելու, կա՛մ դու ժամանակավոր նահանջում ես և հաղթելու ես»,- ասել է փորձագետը` ընտրություններին չմասնակցելու ԲՀԿ-ի որոշումը համարելով ճիշտ:
Իհարկե, նախագահը կհաղթի էպոսագետին, սակայն հետո ստիպված կլինի գնալ արմատական բարեփոխումների, վնասել իր օլիգարխ հենարանների շահերը, որոնք էլ կգնան ԲՀԿ` ծանրացնելով Սերժ Սարգսյանի վիճակը: «ՀՀԿ-ն շատ կուզենար, որ ՀԱԿ առաջնորդը առաջադրվեր, և ինքը հաղթեր: Ու կհաղթեր: Եվ սա իրեն կտար լեգիտիմություն: Իսկ հիմա նա հաղթող չէ: Ունենք էպոսագետին հաղթած նախագահ: Այսօր ակնհայտ է, որ ընտրությունները մրցակցային չեն: Քաղաքական հարցը անորոշ ժամանակով կախվել է, ոչ ոք չգիտի` երբ ՀԱԿ-ն ու ԲՀԿ-ն կսկսեն հարձակումները»,- ասել է փորձագետը:
