Cinema Concept Production ընկերությունը ծրագրում է 1988թ. դեկտեմբերի 7-ին Սպիտակում տեղի ունեցած երկրաշարժի մասին հայ-ռուսական «11:41» համատեղ ֆիլմի նկարահանումները սկսել 2015թ. հունվարին: Ֆիլմի բյուջեն կկազմի մոտ 2,5 մլն դոլար, հայտարարել է ընկերության գլխավոր տնօրեն Ալեք Շահբազյանը, հայտնում է «Կավկազսկի ուզելը»:
Ֆիլմի պրոդյուսերն ու սյուժեի հեղինակը Ալեք Շահբազյանն է:
«11:41» ֆիլմի սինոփսիսն արդեն նկարահանված է, այն կարելի է տեսնել film.ru կայքում: Ֆիլմի նկարահանումները ծրագրվում է սկսել հունվարյան արձակուրդներից հետո: Դրանք, հավանաբար, կես տարի կտևեն, պատմել է Ալեք Շահբազյանը:
Ֆիլմում, որի նկարհանումները կանցկացվեն Երևանում, Գյումրիում և Մոսկվայում, նախատեսվում է հայ և ռուս դերասանների՝ Արմեն Ջիգարխանյանի, Եվգենի Սիդիխինի, Չուլպան Խամատովայի, Ռաֆայել Քոթանջյանի, Մկրտիչ Արզումանյանի և Սոս Ջանիբեկյանի մասնակցությունը:
Սյուժեի հիմքում երիտասարդ կնոջ և նրա մեկուկես տարեկան երեխայի պատմությունն է: Երկրաշարժից հետո նրանք փլատակների տակ են մնացել, ինչպես Լենինականի տասնյակ հազարավոր բնակիչները:
Ըստ սյուժեի՝ երիտասարդ մայրը 7 օր փորձում է պայքարել իր դստեր կյանքի համար՝ մինչև արյուն հանելը կրծելով սեփական մատները, որ փոքրիկին կերակրի: Երբ պայքարելու ուժ նրան գրեթե չի մնացել, գալիս է երկար սպասված օգնությունը: Նրանց հանում են փլատակների տակից ու փրկում:
Ֆիլմի ռեժիսոր Արտակ Զիլֆիմյանը ծնունդով Լենինականից է. նա ինքը տեսել է այդ երկրաշարժը: Սցենարի հեղինակներից մեկը Լուսինե Մանուկյանն է:
