«Բոլոր այն ուժերը, որ կարող էին մրցակցել, պոտենցիալ մրցակիցները հասկացան, որ մրցակցությունն այս փուլում իմաստ չունի: Եթե հաշվի առնենք, որ այսօր ռեսուրսները բավական սակավ են, յուրաքանչյուրը նպատակահարմար գտավ չմասնակցել»,- նախագահական ընտրությունների վերաբերյալ հայտնի ուժերի դիրքորոշումների մասին «Արմնյուզ» հեռուստաընկերության «Բանաձև» հաղորդման եթերում ասել է քաղաքագետ Արմեն Մինասյանը:
Նրա խոսքերով՝ ի սկզբանե թե՛ Լևոն Տեր-Պետրոսյանի, թե՛ Գագիկ Ծառուկյանի առաջադրումը 50/50 էր. «Առաջադրումը ենթադրում է ոչ միայն եկամուտ, այլև կորուստներ` իմիջի, քաղաքական առումներով, իրողությունների վեր հանում, ինչը առաջին փուլով տեսանք խորհրդարանական ընտրությունների իմաստով»:
Թե ֆորմալ առումով ինչ ձև կունենա ՀԱԿ-ը 2013-ին, քաղաքագետը չգիտի, բայց վստահ է, որ այդ ուժն այլևս գոյություն չունի, որովհետև միակ «սոսնձողը» Տեր-Պետրոսյանն էր: «Նման բրգաձև հիերարխիկ կառուցվածքը բնորոշ է Հայաստանին և հետխորհրդային երկրների քաղաքական և քաղաքացիական ինստիտուտներին»,- ասել է Արմեն Մինասյանը` հավելելով, որ ՀԱԿ-ը գալիս էր` հայտարարելով թափանցիկության մասին, սակայն ներսում այդպիսին չէր. կար որոշումների կայացման ներքին թափանցիկության խնդիր:
Փաստացի, Տեր-Պետրոսյանի միջոցով իշխանափոխության խնդիրը ՀԱԿ-ը չլուծեց: Սակայն, ըստ քաղաքագետի, նոր սերնդի ի հայտ գալու լուրջ հնարավորություն կա: Նրա խոսքերով՝ Սերժ Սարգսյանի հաղթանակը կասկածից վեր է, և առաջին անգամ կունենանք նախագահ, ով կկառավարի երկրորդ ժամկետը առանց հասարակության մեջ բևեռների բաժանման: