Ամերիկյան Ford ավտոարտադրողը ԱՄՆ-ում մինչև 2015 թվականը 12 հազար աշխատատեղ կստեղծի: Ինչպես հաղորդում է Agence France-Presse գործակալությունը, սկզբնական շրջանում կոնցեռնը 773 մլն դոլար կներդնի Միչիգան նահանգում արտադրության ընդլայնման համար, ինչը թույլ կտա 2350 աշխատատեղ ստեղծել:
Ընկերությունում նշում են, որ ներդրումները թույլ կտան պահպանել ևս 3200 աշխատատեղ: Ջիմ Տիտրոն` Հյուսիսային Ամերիկայում ընկերության արտադրական գծով փոխնախագահը, հավելել է, որ հզորությունների ընդլայնումը պատասխանում է աճին ուղղված Ford-ի ագրեսիվ քաղաքականությանը:
Միչիգան նահանգում են գտնվում Ford-ի հիմնական արտադրական հզորությունները: Այնտեղ է տեղակայված նաև ընկերության գլխավոր գրասենյակը (Դեթրոյթի Դիրբորն արվարձան):
Ընկերությունն աշխարհում ունի 65 գործարան, որտեղ աշխատում է 172 հազար մարդ:
Նոյեմբերին ընկերությունը գրանցել է 2005 թվականից հետո ամենալավ ամսական արդյունքը: Վաճառքի ծավալն աճել է 6 տոկոսով, ինչը պայմանավորված է էկոնոմ ավտոմեքենաների պահանջարկի աճով:
