Սիրիայի հարցով ՄԱԿ-ի և ԱՊԼ հատուկ բանագնաց Լախդար Բրահիմին կոչ է արել ստեղծել համասիրիական անցումային կառավարություն, որը կստանձնի երկրի իշխանությունը մինչև ազգային ընտրությունները, հաղորդում է RBK-ն:
«Սիրիացի ժողովուրդը ցանկանում է իրական փոփոխություններ»,- Դամասկոսում լրագրողներին հայտարարել է Բրահիմին: Դրա հետ մեկտեղ նա ընդգծել է, որ անցումային փուլում չի կարելի թույլ տալ «պետության կամ պետական ինստիտուտների փլուզում»:
Այսպիսով, ՄԱԿ-ի հատուկ բանագնացը հիշեցրել է, այսպես կոչված, «Ժնևյան կոմյունիկեի» դրույթների մասին (փաստաթուղթ, որը Սիրիայում խաղաղ կարգավորման «Գործողությունների խմբի» կողմից 2012թ. հունիսին ընդունվել է Շվեյցարիայում):
Փաստաթուղթն առաջարկում է Սիրիայում ստեղծել անցումային կառավարություն, որը կարող է ներառել ինչպես ներկայի պաշտոնական կառավարության անդամներին, այնպես էլ ընդդիմության ներկայացուցիչներին:
Հիշեցնենք, որ դեկտեմբերի 24-ին ՄԱԿ-ի հատուկ բանագնաց Լախդար Բրահիմին Դամասկոսում հանդիպել է Սիրիայի նախագահ Բաշար Ալ-Ասադի հետ և նրա հետ քննարկել է «քայլեր, որոնք անհրաժեշտ են ձեռնարկել ճգնաժամը լուծելու համար»:
