«Ոչ մի անակնկալ, ոչ մի արտառոց բան չկա. քանի որ այս ընթացքում ձևավորվել էր հասարակական պահանջ, որ ոչ մի մութ անկյուն չմնա գործարքի մեջ, մենք որոշել ենք գնահատված արժեքի 100%-ի չափով գույքը օտարել աճուրդով: Դա ենթադրում է, որ ցանկացած իրավաբանական, ֆիզիկական անձ կարող է մասնակցել աճուրդին և կարող է գույքը ձեռք բերել: Ես չեմ կարծում, որ հասարակությունը դժգոհ է, որ ԱԳՆ շենքը վաճառում ենք: Այդ ամիսների ընթացքում տարբեր քննարկումների ժամանակ պահանջն այն էր, որ վաճառքը լինի ավելի թափանցիկ»,- այսօր կառավարության նիստից հետո լրագրողների հետ ճեպազրույցի ժամանակ հայտարարեց Պետական գույքի կառավարման վարչության պետ Արման Սահակյանը:
Ըստ նրա՝ օտարման եղանակներ են և՛ ուղղակի վաճառքը, և՛ աճուրդը, ու եթե կլինեն ավելի բարձր գին տվողներ, իսկ գույքը գնահատվել է շուկայական գնով՝ մոտ 52 մլն դոլար, փորձելու են այն օտարել աճուրդով: Սահակյանը նկատեց, թե այնպես չի, որ «Տանգո» ընկերությունը հրաժարվել է գույքը ձեռք բերելուց: «Տանգո» ընկերության հետ, որպես հայտնի գնորդի, կնքվելու է նախնական պայմանագիր, որ եթե աճուրդի ընթացքում ձևավորվի ավելի բարձր գին տվող գնորդ, գույքը պետք է օտարվի նրան, եթե ոչ` բանակցությունները «Տանգո»-ի հետ կշարունակվեն: Աճուրդը պետք է կազմակերպվի մինչև մարտ:
Սահակյանը հիշեցրեց, որ կառավարության առաջին որոշմամբ «Տանգո» ընկերության դուստր «Սալսա» ընկերությունը ձեռք բերեց Վազգեն Սարգսյան 3 հասցեում գտնվող հողատարածքը, իսկ պայմանն այն էր, որ կառուցվի հայտնի շենքը, ուր պետք է տեղափոխվեին արտգործնախարարությունը և մի քանի այլ գերատեսչություններ, ապա բաժնետոմսերի փոխանակման միջոցով ձեռք կբերվի այսօրվա ԱԳՆ շենքը, իսկ մնացած գումարը կգնա բյուջե կամ այլ վարչական շենքերի կառուցման նպատակով:
Սահակյանը նշեց, որ գոյություն ունեն աճուրդի պայմաններ՝ ֆիքսված է, որ տեղում պետք է կառուցվի եվրոպական չափանիշներին համապատասխան հյուրանոց, և «Տանգո»-ին առաջարկված պայմանները մնում են նույնը: Աճուրդը բաց է և թափանցիկ, ցանկացած կազմակերպություն կարող է մասնակցել:
«Ամենակարևորը, որ մեր շենքի պատմամշակութային տեսքը չի խաթարվելու»,- հայտարարեց Սահակյանը:
Հարցին՝ գուցե քաղաքական իրադրության փոփոխությո՞ւնն է կառավարության որոշման փոփոխության պատճառը, քանի որ «Տանգո»-ի սեփականատեր Էդուարդո Էռնեկյանի անձը և ԱԳՆ շենքի գործարքը կապում են Ռոբերտ Քոչարյանի հետ, Ա. Սահակյանը պատասխանեց. «Քաղաքական ենթատեքստով հարցադրումներին պետք է պատասխանեն քաղաքական գործիչները, բայց ես ԱԳՆ գործարքը, Էռնեկյանի հետ գործարքը չեմ կապում քաղաքականության հետ: Սա զուտ պետության շահերից բխող հարց է»:
