Վրաստանի նախկին նախագահ Միխեիլ Սաակաշվիլին դիմել է վրաց ժողովրդին՝ կոչ անելով քննարկել երկրի զարգացման մոդելը: Այս հայտարարությունը նա տեղադրել է իր ֆեյսբուքյան էջում:
Սաակաշվիլին իր էջն առաջարկել է որպես հարթակ Վրաստանի ապագան քննարկելու համար: «Ես ձեզ եմ դիմում խնդրանքով. կիսվեք ձեր գաղափարներով ու խորհուրդներով: Գրեք ինձ ֆեյսբուքյան էջում: Իմ թիմի հետ ես ամենին կծանոթանամ, ձեր առաջարկների վերլուծության արդյունքում քննարկման կառաջարկեմ մեր երկրի նոր օրվա տեսլականը»,- գրել է նա:
Սաակաշվիլին երկրի համար առաջարկել է 7 առաջնայնություն՝ կրթություն, ազատություն, տնտեսության զարգացում, ապակենտրոնացում, ավանդական հասարակություն՝ կառուցված տոլերանտության սկզբունքների հիման վրա, նաև եվրոպականացում և բալանսավորված իշխանություն): Միաժամանակ նա բացասաբար է գնահատել երկրի ներկայիս վիճակը՝ հայտարարելով, որ նա «սողում է հետ՝ անցյալ»:
