Լեռնային Ղարաբաղի վարչապետ Արա Հարությունյանը այսօր «Առաջին լրատվական»-ի հետ զրույցում կրկին բացառեց, որ Հայաստանի՝ Եվրասիական տնտեսական միությանն (ԵՏՄ) անդամակցելուց հետո հայկական երկու պետությունների միջև մաքսակետ կդրվի: «Բացառվում է մաքսակետ ունենալ ԼՂՀ եւ ՀՀ միջև: Ի դեպ, կան մարդիկ, ովքեր ներկա հսկիչ կետերը շփոթում են մաքսակետերի հետ, այնինչ դրանց գործառույթն ուղևորափոխադրումներն ու ապրանքաշրջանառությունը վերահսկելն է: Երկրորդ՝ անհնար է մաքսակետ ունենալ, քանի որ դա նշանակում է սահմանի վերահսկողություն սահմանապահների կողմից, իսկ ԼՂՀ-ի և ՀՀ-ի միջև առկա են տասնյակ ճանապարհներ, որոնց հսկողությունը տեխնիկապես անհնար է»,- օրեր առաջ անդրադառնալով այդ հարցին՝ ասել էր Ա.Հարությունյանը:
Հիշեցնենք, որ անցած ուրբաթ՝ հոկտեմբերի 10-ին, Սերժ Սարգսյանը Մինսկում ստորագրեց ԵՏՄ-ին անդամակցելու պայմանագիրը: Եվ մեր երկիրը 2015թ. հունվարից կանդամակցի Ռուսաստանի հովանու ներքո ստեղծվող այդ կառույցին և ՌԴ-ից, Բելառուսից ու Ղազախստանից հետո կդառնա չորրորդ անդամը: Իսկ այս անդամակցության դեպքում կարծիքներ են հնչում, թե ՀՀ-ի և ԼՂՀ-ի միջև մաքսակետ է դրվելու, քանի որ Արցախը Հայաստանի հետ միասին չի դառնում ԵՏՄ անդամ: Իսկ այդ մաքսային սահման դրվելու համար շահագրգիռ են հատկապես Ղազախստանն ու Բելառուսը՝ տուրք տալով իրենց տնտեսական գործընկեր Ադրբեջանին: Հիշեցնենք, որ Ղազախստանի նախագահ Նուրսուլթան Նազարբաևը Ս.Սարգսյանի կողմից ԵՏՄ-ին անդամակցելու պայմանագրի ստորագրումից հետո Մինսկում հայտարարել էր, թե Հայաստանի՝ ԵՏՄ-ին անդամակցելու բանակցությունների ընթացքում կարգավորվել են բոլոր իրավապահ և տնտեսական հարցերը: «Մեզ հաջողվեց հասնել փոխզիջմանը մի շատ նուրբ հարցում, թե ինչ սահմաններում է Հայաստանը անդամակցելու ԵՏՄ-ին»,- ասել է Նազարբաևն իր ելույթի ժամանակ՝ նշելով, թե Ղազախստանը չի տեսնում ոչ մի խոչընդոտ Հայաստանը ԵՏՄ-ին անդամակցելու հարցում:
ՀՀ-ի և ԼՂՀ-ի միջև մաքսակետ դրվելու մասին հաճախ հայտարարում են Ռուսաստանի փորձագետները: Արդյոք այս ամենը չի նշանակում, որ հայկական երկու պետությունների միջև, իսկապես, մաքսակետ է դրվելու: Այս հարցի շուրջ «Առաջին լրատվական»-ը զրուցել է ԼՂՀ վարչապետ Արա Հարությունյանի հետ:
– Պարոն Հարությունյան, Դուք կտրուկ հերքում էիք, որ կարող է մաքսակետ դրվի Հայաստանի և Լեռնային Ղարաբաղի միջև: Բայց կարծես թե այն իրականություն է դառնում: Այդ մասին ակնարկում են Ղազախստանն ու Բելառուսը:
– Դա չի կարող իրականություն դառնալ: Դա ոչ միայն բացառվում է, այլև անհնարին է, որ Հայաստանի և Ղարաբաղի միջև անցակետ լինի:
– Բայց այդ մասին արդեն ՌԴ-ից այնպիսի գործիչներ են խոսում, ովքեր պատահական մարդիկ չեն:
– Չի լինելու, չի լինելու միանշանակ: Ես չգիտեմ, թե ռուսական քաղաքական դաշտում ինչ նշանակություն ունեն այդ գործիչները, բայց ես միանշանակ կարող եմ ասել, որ չի լինելու:
– Ինչո՞ւ եք համոզված, որ չի լինելու:
– Որովհետև առաջին հերթին դա անհնարին է: Ես նաև գիտեմ Հայաստանի ղեկավարների դիրքորոշումն այդ հարցի վերաբերյալ:
– Բայց ԵՏՄ-ում ՌԴ-ից բացի՝ Ղազախստան կամ Բելառուս կան, ովքեր այդ կառույցում Հայաստանին պարտադրում են, որ պետք է Ղարաբաղի սահմանին մաքսակետ դրվի:
– Չի լի-նե-լու:
– Բայց Դուք չէք էլ բացատրում, թե ինչու եք այդպես համոզված:
– Անդամակցելուն մի քանի ամիս է մնացել, չէ՞: Երեք ամսվա մեջ մաքսակետ չեն կառուցում:
– Բայց մաքսակետ կառուցելն այդքան բա՞րդ բան է: Կամ եթե երեք ամսվա ընթացքում չեն կարողանա կառուցել, մի փոքր ավելի ուշ կկառուցեն:
– Շատ դժվար բան է: Մաքսակետ ունենալու համար պետք է ունենալ մաքսային սահման, հետո՝ մաքսակետ, հո միայն կետով չի՞ որոշվում այդ ամենը:
– Նաև պայման կա, որ Եվրասիական տնտեսական միության տարածք չի թույլատրվում ներմուծել ԼՂՀ-ի արտադրանքը:
– Այսօր էլ չի թույլատրվում, այսօր էլ մենք խնդիրներ ունենք, այսօր էլ Եվրոպան, Ռուսաստանը ԼՂՀ-ն որպես առանձին երկիր չեն ընդունում, բայց մենք արտահանում ենք:
– Հայաստանո՞վ միջնորդավորված:
– Եկեք այդ հարցերի մասին չխոսենք և խնդիրներ չբերենք Ղարաբաղի համար: Այսօր մենք արտահանում ենք մեր արտադրանքը:
– Կարող է խնդիր առաջացնել ոչ միայն տնտեսական, այլև ռազմամթերքի՞ առումով:
-Նորից եմ ասում, բացառվում է, մի երկու ամիս սպասեք և կտեսնեք:
