Գեղարքունիքի համայնքներում սիբիրախտի պատճառով հայտարարված կարանտինն ավարտվեց: Ինչպես այսօր ասուլիսում հայտնեց գյուղատնտեսության նախարար Սերգո Կարապետյանը, մարզպետարանում խորհրդակցություն է եղել, և քանի որ վերջին անգամ անասունի անկում վաղուց է եղել, նման որոշում է ընդունվել: Պատճառաբանելով, որ ընդամնեը 12 անասուն է անկել՝ նախարարը հայտարարեց, որ սիբիրախտի պատճառով գյուղացիներին կրած վնասների փոխհատուցում չի տրվելու:
Ըստ նրա՝ գյուղատնտեսությունում ապահովագրությունը հսկայական ծախսերի հետ է կապված: Նախարարության մասնագետները միջազգային փորձն են ուսումնասիրել, և մեր երկրում նախատեսվում է սկզբում անասնապահության ոլորտում ապահովագրություն ներդնել:
Ըստ Ս. Կարապետյանի՝ 2012 թ. օպերատիվ տվյալներով, հիմնական անասնապահական մթերքների արտադրության ծավալները գերազանցում են նախորդ տարվա մակարդակը 3.3-3.8 %-ով: Տարեսկզբի դրությամբ, նախորդ տարվա նույն ժամանակահատվածի համեմատ, խոշոր եղջերավորների գլխաքանակն ավելացել է 27.9 հազ. գլխով, այդ թվում` կովերինը 10.8 հազ. գլխով, մանր եղջերավորներինն ավելացել է 57.7 հազ. գլխով: Նշված ժամանակա¬հատվածում 561 հազ. գլխով ավելացել է նաև թռչունների գլխա¬քանակը:
