Բնապահպանական տարին ամփոփեց ՀՀ բնապահպանության նախարար Արամ Հարությունյանը: Այսօր լրագրողների հետ հանդիպման ընթացքում, հանդես գալով տարեվերջյան ասուլիսով, ՀՀ բնապահպանության նախարար Արամ Հարությունյանն անդրադարձավ բնապահապանական նախարարությանը հատկացված բյուջեին, Սևանա լճի հիմնախնդիրներին, «Արփի լիճ» ազգային պարկի կարողությունների զարգացմանը, Արարատյան դաշտավայրում ստորերկրյա ջրերի արդյունավետ օգտագործման ապահովմանը, բնապահպանական միջոցառումներին, կենսառեսուրսների պահպանության և կառավարման բնագավառին, հատուկ պահպանվող տարածքներին, մթնոլորտային օդի պահպանության բնագավառին, ընդերքի և հողերի պահպանության բնագավառին, վտանգավոր նյութերի և թափոնների կառավարման բնագառին, բնապահպանական պետական փորձաքննության բնագավառին, տեսչական վերահսկողական աշխատանքներին, միջազգային համագործակցությանը և հասարակայնության հետ կապերի բնագավառին:
Նախարարը տեղեկացրեց, որ ՀՀ 2012 թ. պետական բյուջեով նախարարությանը հատկացվել է 2088, 5 մլն դրամ: Այս տարի նախարարության կողմից իրականացված աշխատանքների հիմնական նպատակն է եղել ՀՀ կառավարության 2012 թ. գործունեության միջոցառումների ծրագրի և ՀՀ կառավարության կողմից հաստատված ռազմավարական նշանակության ծրագրերով նախատեսված բնապահպանական ոլորտի գծով գերակա խնդիրների կատարման ապահովումը:
Տարվա ընթացքում մշակվել են երեք օրենքների նախագծեր, մշակվել են նաև ՀՀ կառավարության 34 որոշումների նախագծեր, որոնցից ընդունվել է 21-ը, իսկ 13-ը համապատասխան ընթացքի մեջ են, ինչպես նաև, ՀՀ վարչապետի որոշմամբ, վեց իրավական ակտեր են հաստատվել:
Խոսելով նախարարության ձեռքբերումներից և բացթողումներից՝ նախարարն ասաց, որ ձեռքբերում էր առաջին անգամ իրականացված թունաքիմիկատների լայնամասշտաբ ուսումնասիրությունը, ինչպես նաև «Արփի լիճ» ազգային պարկի բացումը, «Թռչկան»-ի ջրվեժի անձնագրավորումը, 24 բնության հուշարձանների անձնագրավորումը: Բացթողումը, նախարարի խոսքերով, եղել է միայն Սևանա լիճ ձկների բացթողումը:
Խոսելով Քաջարան գյուղի խնդրից՝ նախարարն ասաց, որ այս դեպքում բնապահպանության նախարարությունը շատ գործառույթներ չունի:
Բնապահպան ակտիվիստներին անդրադառնալով՝ Արամ Հարությունյանը նկատեց, որ բնապահպանական կառույցների, ակտիվիստների հետ մշտական համագործակցության մեջ են, լինում են դեպքեր, երբ անհարկի խնդիրն ուռճացվում է, սակայն նախարարությունն աշխատանքային ռեժիմի մեջ է: Իր հրաժարականի պահանջի խոսակցություններին նախարար Արամ Հարությունյանը կարծես նորմալ է վերաբերում. «Նման հարց բարձրացնելն իրենց իրավունքն է, ուղղակի ուզում եմ ասել, մեր նախարարությունում թիմ կա, գիտությունների դոկտորներ, լավ մասնագետներ, որոնք իրենց առջև դրված խնդիրները կարգավորելուն պատրաստ են»:
