Դաշնակցություն կուսակցությունն ակնհայտորեն փնտրտուքների մեջ է: Իր տեղը չգտնելով ոչ իշխանական քառյակում՝ փորձում է այժմ էլ իշխանության հետ համագործակցության եզրեր գտնել: Եվ որքան էլ այդ կուսակցության անդամները փորձեն հերքել, թե Հանրապետական կուսակցության հետ չեն ցանկանում կոալիցիա կազմել և պաշտոններ ստանալ, այնուամենայնիվ՝ իշխանությունների հետ նման քննարկումներ ընթանում են: Դա են վկայում թե՛ քաղաքական կուլիսներում ծավալվող խոսակցությունները, թե՛ իշխանությունների նկատմամբ ՀՅԴ-ի մեղմ, գրեթե ոչ քննադատական պահվածքը:
Արդեն իսկ մամուլում հրապարակումներ են շրջանառվում, թե Սյունիքում Սուրիկ Խաչատրյանի մարզպետ նշանակվելու պատճառով հրաժարականի դիմում է ներկայացրել փոխվարչապետ, տարածքային կառավարման նախարար Արմեն Գևորգյանը, ում փոխարեն ցանկանում է նշանակվել ՀՅԴ անդամ Դավիթ Լոքյանը: «Առաջին լրատվական»-ի տեղեկություններով, սակայն, իրականությունը փոքր-ինչ այլ է. Արմեն Գևորգյանը ոչ թե Սուրիկ Խաչատրյանի նշանակման պատճառով է հրաժարական տալու, այլ միգուցե դա նրան առաջադրվել է: Շրջանառվող տեղեկությունների համաձայն՝ ՀՅԴ-ն ՀՀԿ-ի հետ համագործակցելու համար փոխվարչապետի պաշտոնն է ուզում, և դա ուզում է Դ. Լոքյանի համար:
ՀՅԴ-ն ուզում է ևս երեք՝ մշակույթի, կրթության և գիտության ու աշխատանքի և սոցիալական հարցերով նախարարությունները:
Պարզապես այդ կուսակցությունում դեռ զգուշանում են իրենց շարքերից, շարքային կուսակիցներից, ովքեր կարող է չհասկանան ղեկավարության այդ քայլը և միգուցե դեմ դուրս գան իրենց ղեկավարներին: Այս կուսակցության դեպքում միշտ էլ խոսակցություններ են եղել, որ շարքային անդամները դժգոհ են ղեկավարներից, որ նրանք պաշտոններ ստանալով կամ իշխանությունների հետ այլ համագործակցությունների արդյունքում հարստանում են, իսկ իրենց բաժին է ընկնում միայն բացասական համբավը: Այնպես որ՝ ՀՅԴ-ն դեռ բանակցում և մտածում է:
Իսկ իշխանություններին, հատկապես վարչապետ Հովիկ Աբրահամյանին անհրաժեշտ է Դաշնակցության հետ կոալիցիայի կազմումը: Փոխվարչապետի պաշտոնը նա է խոստացել Դ. Լոքյանին: Վերջինս, ասում են, վարչապետի հետ բավականին մտերիմ է, նրա հետ համատեղ բիզնես ունի: Եվ դրա շնորհիվ է, որ Դ. Լոքյանի որդին՝ Սերգեյ Լոքյանը, Հ. Աբրահամյանի հետ գերատեսչությունից գերատեսչություն է տեղափոխվում:
Հ. Աբրահամյանին անհրաժեշտ է ՀՅԴ-ի հետ համագործակցությունը իր գործողությունների և ծրագրերի համար աջակցություն ստանալու նպատակով: Առաջիկայում կառավարությունն Ազգային ժողով է ներկայացնելու 2015թ. բյուջեի նախագիծը: Եվ որպեսզի այն չքննադատվի նաև ՀՅԴ-ի կողմից, հակառակը՝ այդ կուսակցության կողմից որոշակի աջակցություն ստանա, Հ. Աբրահամյանը ցանկանում է նրանց պաշտոններ տալ:
Մյուս կողմից էլ՝ վարչապետը ցանկանում է ազատվել վերը նշված նախարարությունների ղեկավարներից: ԿԳ նախարար Արմեն Աշոտյանը թեև ճկուն գործելաոճ է դրսևորում փոփոխվող վարչապետերի նկատմամբ, այնուամենայնիվ՝ կառավարությունում Հ. Աբրահամյանի սիրելիներից չէ՝ մանավանդ, որ նրան չեն սիրում նաև Հ. Աբրահամյանի խնամի Գագիկ Ծառուկյանի ղեկավարած «Բարգավաճ Հայաստան» կուսակցությունում: Սոցապնախարար Արտեմ Ասատրյանն ի սկզբանե է հայտնվել Հ. Աբրահամյանի թիրախում՝ նա համարվում է նախկին վարչապետ Տիգրան Սարգսյանի կադրերից և այդ պատճառով էլ չի ընդունվում Հ. Աբրահամյանի կողմից: Ինչ-ինչ պատճառներով Հովիկ Աբրահամյանի համար ընդունելի չէ նաև մշակույթի նախարար Հասմիկ Պողոսյանը: Ուստի ՀՅԴ-ի հետ համագործակցելու և նրանց այդ պաշտոնները տալու միջոցով վարչապետը միաժամանակ կազատվի նաև այդ նախարարներից:
Այնպես որ՝ չի բացառվում, որ առաջիկայում ՀՅԴ-ն խորացնի հարաբերությունները ՀՀԿ-ի հետ և որոշ պաշտոններ ստանա:
Լուսանկարը` PanARMENIAN Photo-ի
