ՄԱԿ-ի հետ համագործակցության շրջանակում այսօր Երևանում մեկնարկեց «Քաղաքների պլանավորման և աղետների ռիսկերի նվազեցման ազգային կարողությունների հզորացում» խորագրով աշխատաժողովը:
Քաղաքաշինության նախարարության բնակարանային ֆոնդի պահպանման բաժնի պետ Սամվել Սրափյանը «Առաջին լրատվական»-ի հետ զրույցում ասաց, որ Հայաստանի բազմաբնակարան շենքերի 90 տոկոսը սեյսմակայուն չէ. նախատեսված են մինչև 7 բալանոց երկրաշարժի համար: Ըստ նրա՝ Հայաստանում արդեն իսկ կառուցված շենքները սեյսմակայուն դարձնելու համար հսկայական գումարներ են պետք: Ավելին՝ դա հիմնականում պետք է անեն շենքների բնակիչները, քանի որ իրենք են այժմ սեփականատերերը: «Դա սեփականատիրոջ պարտականությունն է»,- նշեց Սրափյանը: Նրա խոսքով՝ յուրաքանչյուր բնակելի մետրը սեյսմակայուն դարձնելու համար պետք է 110-150 հազար դրամ: Բնակարանատիրոջ վրա դա կարող է նստել 6-8 մլն դրամ: Պետությոնը կարող է համաֆինանսավորել, սակայն գումարի գոնե 20-30 տոկոսը պետք է վճարի սեփականատերը:
«Պետական աջակցության մեխանիզմները մշակված են, սակայն պատրաստակամություն չի երևում նման ծախսեր կատարելու»,- ասաց նախարարության ներկայացուցիչը:
Քանի որ նման եկամուտներ մեր քաղաքացիների մեծ մասը չունի, դժվար է ասել՝ Հայաստանի բնակարանային ֆոնդը երբ կդառնա սեյսմակայուն՝ չնայած սեյսմիկ անկայուն գոտում գտնվելու հանգամանքին:
Դիտե՛ք տեսանյութը:
