«Առաջին լրատվական»-ի հարցերին պատասխանում է Հայաստանում Ռուսաստանի առևտրային ներկայացուցիչ Անդրեյ Բաբկոն:
–Ռուսաստանի նկատմամբ տնտեսական պատժամիջոցները չե՞ն խանգարի Հայաստանի և Ռուսաստանի տնտեսական համագործակցությանը:
–Ընդհակառակը, ոչ թե կխանգարեն, այլ կօգնեն: Հայաստանն ու Ռուսաստանը մեծ պոտենցիալ ունեն: Հայաստանը դեռ Խորհրդային Միության տարիներին բազային վայր է եղել գիտության համար: Իհարկե, Ռուսաստանի և Հայաստանի նոր հարաբերությունները այդ առումով, ընդհակառակը, միայն կօգնեն: Կարող ենք այստեղ արտադրություն կազմակերպել, որը ապագայում ԵՏՄ-ի շրջանակներում ծառայելու է ողջ Մաքսային միությանը: Ոչ մի խնդիր չկա, ընդհակառակը, նոր առաջարկներ են լինում բիզնեսի բնագավառում, նոր գործարար գաղափարներ, պետք է իրականացնենք:
–Հիմա կա՞ն որոշակի ծրագրեր:
–Օրինակ, մենք հիմա շատ ակտիվ աշխատում ենք հայկական գյուղմթերք արտադրողների հետ, օգնում ենք Հայաստանի գյուղատնտեսության նախարարությանը Ռուսաստանի շուկա բնամթերքի մատակարարման համար՝ հաշվի առնելով այն պատժամիջոցները, որոնք մենք սահմանել ենք, որպեսզի չգնեն հայտնի երկրների մթերքները:
Հիմա մասամբ, քանի որ Հայաստանը մեծ երկիր չէ, մեր շուկայում լավ, որակյալ մթերք մատակարարում են հայ գյուղատնտեսները՝ բանջարեղեն, մրգեր, հյութեր և այլն:
–Եվ ի՞նչ ծավալներով:
–Նախորդ տարվա համեմատ արդեն երեք անգամ ավելացել են Հայաստանից Ռուսաստանում մատակարարումները:
–Այլ ոլորտներում համագործակցություն կա՞:
–Դե, թաքցնելու կարիք էլ չկա, որ ռուսական բիզնեսը առկա է բոլոր ոլորտներում՝ էներգետիկա, հեռահաղորդակցություն, տրանսպորտ, բանկային համակարգ, ապահովագրության ոլորտ: Երևի թե գյուղատնտեսությունը այն սակավաթիվ ոլորտներից է, որը գործունեության, Ռուսաստանից նոր ներդրումներ, տեխնոլոգիաներ, սարքավորումներ բերելու համար նոր դաշտ է: Ես կարծում եմ՝ ջանքերի գործադրման շատ լավ առաջարկ է:
Համագործակցության ոլորտում մեծ մասը բժշկական ընկերություններ են: Ես համարում եմ, որ Հայաստանում առողջապահությունը բավականին լավ, բարձր մակարդակի վրա է զարգանում և կարծում եմ՝ ռուսական ընկերությունների հետ համագործակցությունը դրական ազդեցություն կունենա: