«Դեռ ընտրությունները չեն սկսվել, ոչ բոլոր թեկնածուներն են առաջադրվել, և անհնար է ասել՝ միասնական թեկնածու կլինի, թե՝ ոչ: Այլ բան է, որ միասնական թեկնածուի տպավորություն չկա»,- «Արմնյուզ» հեռուստաընկերության «Բանաձև» հաղորդման եթերում ասել է ԱԺՄ առաջնորդ, 1996 թվականին նախագահական ընտրություններում ընդդիմության միասնական թեկնածու Վազգեն Մանուկյանը: Նա նշել է, որ միասնական թեկնածուի վերաբերյալ տրամադրությունը փոխվեց, երբ Գագիկ Ծառուկյանը հրաժարվեց առաջադրել իր թեկնածությունը:
Վազգեն Մանուկյանի խոսքերով՝ ուզենք թե չուզենք, ինչ-որ ծրագրային հարցերի շուրջ պետք է ունենալ միասնական թիմ: «96-ին շատ մեզ ուժ էր կոմունիստականը, բայց մեզ չմիացավ, որովհետև այլ էին գաղափարները, ծրագրերը»,- ասել է նա ու հավելել, որ այժմ դժվար է պատկերացնել 3-4 հայտնի ուժերի միավորումը, որոնք ունեն լուրջ գաղափարական տարաձայնություններ:
Ինչ վերաբերում է քաղաքական կոնսուլտացիաներին, ապա, Վազգեն Մանուկյանի խոսքերով, ընտրություններից առաջ բոլոր ուժերը կոնսուլտացիաներ արել են, դրանց հիմնական նպատակը միայն թեկնածուն չէ: ԱԺՄ առաջնորդը, սակայն, չի ընդունում, երբ ասում են, թե պատրաստ են անգամ սատանայի հետ համագործակցել. «Ես քաղաքական ցինիկությունը չեմ ընդունում»:
Ներկա իրավիճակում Վազգեն Մանուկյանն ընտրությունների արդյունքները կանխորոշված է համարում. «Նախագահական ընտրությոններում համարյա միշտ նախագահն ուզում է իր դիրքերն ամրապնդել, իսկ ընդդիմության մեջ մարդ է առաջանում, ում մեջ ժողովուրդը տեսնում է փրկություն: Այժմ նման մարդ չի երևում: Ես չեմ ուզում վատ բան ասել Րաֆֆի Հովհաննիսյանի հասցեին, բայց ինձ չի թվում, թե նա փրկիչն է, և այս տեսակետից ընտրությունները տարբերվում են մյուս դեպքերից»:
Անդրադառնալով ՀՅԴ-ին՝ Վազգեն Մանուկյանը նշել է, որ այդ կուսակցությունը լուրջ քաղաքական ուժ է և հասկանում է, որ առաջադրած թեկնածուն փոքր տոկոս կստանա: Անդրադառնալով ՀԱԿ-ին՝ բանախոսը նշել է, որ Կոնգրեսը ստեղծվեց որոշակի խնդիր լուծելու համար: Այդպիսի մարմինները եթե իրենց առջև դրած նպատակներին չեն հասնում, ապա, ըստ նրա, փլուզվում են: Իսկ Կոնգրեսն ուզում էր հասնել վաղաժամկետ իշխանափոխության:
Վազգեն Մանուկյանը նշել է, որ երբ այս պայմաններում անակնկալներ չկան, դա դեռ չի նշանակում, թե չեն լինելու: Իսկ ամենակարևորը, ըստ նրա, այն է, թե ինչ կլինի ընտրություններից հետո:
