ՕԵԿ-ն ու ՀՀԿ-ն վերահաստատել են իրենց դիրքորոշումը և հանդես են գալիս որպես մեկ ուժ՝ ի դեմս գործող նախագահի, և հավակնում են մեկ փուլով ավարտել նախագահական ընտրությունները: Լրագրողների հետ հանդիպմանը այս մասին հայտնեց «Սոցիոմետր» սոցիոլոգիական կենտրոնի ղեկավար Ահարոն Ադիբեկյանը՝ անդրադառնալով ՀՀ նախագահական ընտրություններից առաջ կուսակցությունների որդեգրած գործելաոճին:
Նրա համոզմամբ՝ ընդդիմադիր դաշտը կորցրեց միավորվելու բոլոր շանսերը, քանի որ յուրաքանչյուրը հանդես եկավ առանձին-առանձին, ինչը հանգեցրեց կորուստների:
Սոցիոլոգի խոսքով՝ Կոնգրեսը հույս ուներ միավորել ընդդիմադիր ուժերին, սակայն ԲՀԿ-ն դուրս եկավ խաղից: «Ծառուկյանի` խաղից դուրս գալը բոլոր խաղաքարտերը խառնեց, քանի որ ՀԱԿ-ը հույս ուներ ԲՀԿ-ի ուսերի վրա գալ իշխանության: Սակայն Ծառուկյանը հայտարարեց, որ չի պաշտպանելու ոչ իշխանությանը, ոչ ընդդիմությանը»,- ասաց նա:
Ինչ վերաբերում է ԲՀԿ-ի ընտրազանգվածի` այս կամ այն թեկնածուին սատարելուն, ապա, ըստ Ադիբեկյանի, այդ զանգվածն ապակողմնորոշված է, և դեռ վաղ է ասել, թե այդ ընտրազանգվածը քաղաքական որ ուժի օգտին կքվեարկի: Ահարոն Ադիբեկյանը համոզված է, որ պայքարից ԲՀԿ-ի դուրս գալով կաշառքների թիվը զգալիորեն կպակասի, սակայն չի վերանա:
Սոցիոլոգի խոսքով` ՀԱԿ-ին հարվածեց իր ներքին պառակտումները:
Ադիբեկյանը կարծում է, որ որպես առանձին կենտրոնամետ ուժ կարող է հանդես գալ Րաֆֆի Հովհաննիսյանը, ՀԱԿ-ի մնացուկները կարող են աջակցել Բագրատյանին, սակայն նա առանձնապես մեծ աջակցություն չի վայելում ժողովրդի կողմից, իսկ մյուս թեկնածուները, ըստ նրա, այնքան աննշան են, որ չեն էլ ուսումնասիրվել իրենց կողմից:
«Ընդդիմությունը ամեն ինչ արեց, որ Սերժ Սարգսյանը գա իշխանության: Իշխանության թեկնածուն հնարավորություն ունի 1 փուլով լուծել հարցերը»,- համոզմունք հայտնեց Ադիբեկյանը:
Նրա խոսքով՝ առաջադրվելու դեպքում «քչից-շատից» շանսեր կունենար նաև Հայաստանի առաջին նախագահ Լևոն Տեր-Պետրոսյանը, սակայն նա մոռացել էր «Մի թքիր ջրհորի մեջ, քանի որ հետո դարձյալ կծարավես» հայտնի ասացվածքը: Ժամանակին նա կտրեց այն ճյուղերը, որոնց վրա կարող էր նստել՝ ի դեմս «Ժառանգության» ու ՀՅԴ-ի, որոնք նրան չեն աջակցի նախագահական ընտրությունների ժամանակ:
