Ֆրանսիայի և ԱՄՆ-ի զինված ուժերի էլիտար ստորաբաժանումները հորդանանա-սիրիական սահմանին պատրաստվում են Բաշար Ասադի վարչակարգի անկման դեպքում Սիրիայի քիմիական զենքի պահեստները պաշտպանել իսլամիստներից:
Ֆրանսիական Օտարերկրյա լեգեոնի հրամանատարությունը վերջին ամիսներին բազմիցս Հորդանանից Սիրիա տեղեկություն ստանալու համար հետախուզական ջոկատներ է ուղարկել:
Անապատի պայմաններում մարտ վարելուն պատրաստված ամերիկյան Delta Force и Rangers հատուկ ստորաբաժանումները ևս պատրաստ են մասնակցելու Սիրիայում հնարավոր օպերացիային` հայտնում է «Ֆոկուս-օնլյան» գերմանական պարբերականը, որը մեջբերում են ինտերնետ-ԶԼՄ-ները: Նրա տեղեկությամբ՝ Իսրայելի Պաշտպանության բանակի գլխավոր շտաբի «Սայերեէ Մատկալ» հատուկ ստորաբաժանումներն արդեն վաղուց ներթափանցել են Սիրիա և պատրաստ են մասնակցելու քիմիական զենք գրավելու` իսլամիստների փորձերի դեմ պայքարին:
Ավելի վաղ իրանական ԶԼՄ-ները հաղորդել էին, որ Սիրիայի ընդդիմադիրները քիմիական զենք են կիրառել սիրիական բանակի զինվորների դեմ:
Հայտնում էին նաև, որ սիրիական բանակի քիմիական զենքի զինանոցը, ինչպես նախկինում, կառավարող վարչակարգի ձեռքում է՝ չնայած զինված պայքարի ընթացքում Ասադի զորքերը կորցրել են երկրի մի մասի կառավարումը: Այս մասին հայտարարել է Իսրայելի պաշտպանության նախարարության ռազմաքաղաքական վարչության պետ Ամոս Գիլադը:
Ըստ նրա՝ Սիրիայում իրավիճակն այնպիսին է, որ զինված ընդդիմությունը չի կարող հաղթել Ասադին, և իշխանություններն էլ չեն կարող հաղթել ընդդիմադիրներին, սակայն գնալով ավելի ու ավելի են Սիրիայի տարածքները դուրս գալիս կառավարական ուժերի վերահսկողությունից:
Հավելենք. Սիրիայի իշխանությունները մտահոգված են, որ ընդդիմադիրները կարող էին քիմիական զենք ստանալ մի շարք երկրներից, այնուհետև դրա օգտագործման մեջ մեղադրել կառավարական զորքերին: