Երևանի բնակիչներ, 40-ամյա Արթուր Ղադամյանն ու նրան տարեկից Արգիշտի Սեդրակյանը, ուրիշի գույքը հափշտակելու շուրջ նախնական համաձայնության գալով, ս/թ փետրվարի վերջերին գնացել են Նոր Նորքի 7-րդ զանգվածի շենքերից մեկը, որտեղ Ա. Սեդրակյանն իր կողմից պատրաստված գործիքներով բացել է բնակարաններից մեկի մուտքի դուռը և, ընկերոջ հետ մտնելով ներս, գողացել «Արիստոն» ջեռուցման կաթսա, DVD ձայնագրիչ, «Պանասոնիկ» տեսաձայնագրիչ, էլեկտրական վառարան և այլ իրեր:
Արգիշտի Սեդրակյանը և Արթուր Ղադամյանը մարտի 23-ին բերման են ենթարկվել ոստիկանության Երևան քաղաքի վարչություն:
Նշենք, որ Արգիշտի Սեդրակյանը նախկին ոստիկան է:
Իրավապահները կարողացել են բացահայտել հանցավոր խմբին գողացված բջջային հեռախոսի միջոցով, որը հանցագործներից մեկը նվիրել էր իր կնոջը:
Ա. Սեդրակյանին պատկանող «Մերսեդես» մակնիշի ավտոմեքենայից հայտնաբերվել է «Մակարով» ատրճանակ՝ 9 մմ տրամաչափի 8 փամփուշտով:
Փաստի առթիվ ՀՀ Քրեական օրենսգրքի 177 հոդվածի 2-րդ մասի 1-ին և 3-րդ կետերով (գողություն, որը կատարվել է մի խումբ անձանց կողմից նախնական համաձայնությամբ, բնակարան, պահեստարան կամ շինություն ապօրինի մուտք գործելով) և ՀՀ Քրեական օրենսգրքի 235 հոդվածի 1-ին մասով (ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը) հարուցվել է քրեական գործ:
Արգիշտի Սեդրակյանը և Արթուր Ղադամյանը կալանավորված են: Նրանք իրենց ցուցմունքներում հայտնել են, որ կատարել են նմանատիպ այլ գողություններ ևս:
Նշենք, որ կալանավորվածների տանը իրավապահները գտել են մոտ ութ հարյուր կտոր իրեղեն ապացույց:
Նախաքննությունը շարունակվում է:
