Ուկրաինայի նախկին վարչապետ Յուլյա Տիմոշենկոն գերմանական Charite բժշկական կենտրոնին իր բուժման համար չի վճարել: Այս մասին ասել է նրան բուժող բժիշկը:
Գերմանացի լրագրողների կարծիքով` Տիմոշենկոն փորձել է մոլորեցնել Ուկրաինայի և Եվրոպայի բնակչությանը: «Իրեն ներկայացնելով որպես զոհ՝ խաբեբա Տիմոշենկոն փորձել է ազդեցություն գործել ոչ միայն եվրոպացի քաղաքական գործիչների վրա: Ուկրաինայի ժողովրդից գողացված գումարներն օգտագործելով՝ իր հզոր PR-մեքենայի օգնությամբ մամուլում խեղաթյուրված հրապարակումների հաշվին նա փորձել է Ուկրաինայի և Եվրոպայի ժողովրդին գցել թյուրիմացության մեջ»,– գրել է Berliner Tageszeitung պարբերականը:
Գերմանացի բժիշկները Տիմոշենկոյի մոտ մահացու հիվանդություն չէին հայտնաբերել, նրան ախտորոշելով որպես «խրոնիկական հիվանդ»։
Ուկրաինայի գլխավոր դատախազությունը ստուգումներ է իրականացնում Батькивщина կուսակցության ֆինանսավորման աղբյուրների նկատմամբ:
2007-2010 թթ. ընթացքում Ուկրաինայում իրականացվել են խորհրդարանական, նախագահական և տեղական ինքնակառավարման մարմինների ընտրություններ: Գլխավոր դատախազի տեղակալի տվյալներով՝ մոտ 100 մլն եվրո վճարվել է Տիմոշենկոյի տեղակալ Գրիգորի Նեմիրեյի կողմից: Ուկրաինայի օրենսդրությամբ նման ծավալի ֆինանսավորումն արգելված է:
Ուկրաինական ընդդիմության ղեկավար Տիմոշենկոն պաշտոնական դիրքի չարաշահման համար 7 տարվա ազատազրկման իր պատիժն է կրում: Պաշտպանական կողմը բազմիցս հայտարարել է Տիմոշենկոյի հիվանդության մասին և պահանջել է անկախ բժիշկների հետազոտություն, քանի որ Տիմոշենկոն չի վստահում ուկրաինացի բժիշկներին:
