«Առաջին լրատվական»-ի զրուցակիցն է Հայաստանում ԵՄ Պատվիրակության ղեկավար Տրայան Հրիսթեան:
-Պարոն Հրիսթեա, վերջերս Եվրամիությունը հայտարարեց, որ մինչև 2017թ. շարունակելու է Հայաստանի ֆինանսավորումը , արդյոք դա նշանակո՞ւմ է, որ ԵՄ-ն ավելի ըմբռնումով է մոտենում սեպտեմբերի 3-ին Հայաստանի իշխանությունների կայացրած շրջադարձային որոշմանը: Եվ ԵՄ-ի մոտեցումն այլեւս այդքան ռադիկալ չէ, որքան սեպտեմբերի 3-ից հետո:
–Թույլ տվեք չհամաձայնել ձեզ հետ, որ սեպտեմբերի 3-ից անմիջապես հետո ԵՄ մոտեցումը ռադիկալ էր: Չէի համաձայնի Ձեզ հետ նաև՝ հատկապես նշելով այն փաստը, որ Վիլնյուսում ՀՀ ղեկավարության հետ որոշման գալը կարելի է համարել ռադիկալ մոտեցում: Ի՞նչ արեց ԵՄ-ն. վերանայեց ֆինանսավորման այն բաղադրիչը, որը միտված էր խորը, համապարփակ ազատ առևտրի համաձայնագրի՝ Ասոցացման համաձայնագրի համար տրամադրվող ֆինանսավորմանը: Ինչ վերաբերում է մյուս ոլորտներին, որտեղ ԵՄ-ն օժանդակություն է տրամադրում Հայաստանին, ապա շարունակում է համագործակցել և գործել իր քաղաքականությանը համահունչ:
Պետք է նշեմ, որ ԵՄ-ն այս առումով գործում է ՀՀ կողմից ստանձնած պարտավորություններին համապատասխան: Ֆինանսավորման այն ծավալը, որը նախատեսվում է 2014-2017թթ. համար, միայն ապացուցում է, որ ԵՄ-ն պատրաստ է և շարունակում է համագործակցել Հայաստանի հետ: Սա, ըստ էության, Հայաստանի և ԵՄ միջև արդեն համաձայնեցված արժեհամակարգի վրա հիմնված քաղաքականության շարունակություն է, և ես չէի ասի, որ մոտեցման մեջ եղել է տարբերություն՝ ավելի ռադիկալից դեպի ավելի փափուկ մոտեցում:
-Պարոն Տրայան, արդեն հայտնի է Եվրոպական հանձնաժողովի կազմը: Ձեր կարծիքով ի՞նչ քաղաքականություն կտանի այդ նոր կազմը մեր տարածաշրջանում:
–Առաջին հերթին ասեմ այն, որ փաստ է՝ հանձնաժողովը նոր կազմով է հանդես գալու, և փաստ է նաև, որ նրանք նոյեմբերի 1-ից ստանձնելու են պարտականությունները: Նոր հանձնաժողովը իր կազմով շարունակելու է իրականացնել այն բոլոր կետերը, որոնց վերաբերյալ ՀՀ կառավարության ղեկավարության հետ մենք համաձայնություն ենք ձեռք բերել Վիլնյուսի գագաթնաժողովի ժամանակ: Հանձնաժողովը դա անելու է մշտապես ու թափանցիկ ձևով: ԵՄ համար Արևելյան գործընկերությունը շարունակում է մնալ գերակայություն:
