Մերձավոր Արևելքի տարածաշրջանում շատ խնդիրներ Մեծ Բրիտանիայի ոչ ճիշտ քաղաքականության հետևանք են: Իրանական Fars գործակալության հաղորդմամբ՝ այս մասին հայտարարել է Իրանի ԱԳՆ մամլո քարտուղար Մարզիե Աֆհամը՝ մեկնաբանելով ՄԱԿ-ում Մեծ Բրիտանիայի վարչապետ Դևիդ Քեմերոնի ելույթը:
Մեծ Բրիտանիայի խորհրդարանը կքննարկի Իրաքի տարածքում օդային հարվածներին Միացյալ Թագավորության զինծառայողների մասնակցության հարցը, չորեքշաբթի օրը ՄԱԿ-ի ԳԱ նստաշրջանում ելույթի ժամանակ ասել է Քեմերոնը՝ նշելով, որ եկել է ժամանակը «գործողությունների նոր փուլ սկսելու» «Իսլամական պետություն» խմբավորման զինյալների դեմ պայքարում:
«Իրանին պետք է հնարավորություն տալ ցույց տալու, որ կարող է լինել լուծման, ոչ թե խնդրի մաս,- ասել է Քեմերոնը:- Այսօր ես հանդիպեցի նախագահ Ռուհանիի հետ: Մենք նրա հետ շատ հարցերում բոլորովին համամիտ չենք, բայց Իրանի ղեկավարները կարող են մեզ օգնել հաղթահարել «Իսլամական պետությունից» եկող սպառնալիքը»:
Այս առիթով Աֆհամն ասել է. «Երկիրը (Մեծ Բրիտանիան), որն ահաբեկիչների կողմնակից է, իրեն թույլ է տալիս դատել Իրանի մասին, որը միշտ ակտիվ է ահաբեկչության դեմ պայքարում»:
