Այսօր ՀՀ էկոնոմիկայի նախարար Կարեն Ճշմարիտյանի և ՄԱԿ-ի արդյունաբերական զարգացման կազմակերպության՝ UNIDO-ի միջև կնքվեց ծրագրային փաստաթուղթ, որը հիմք է դնում «Հայաստանի արտահանման ուղղվածություն ունեցող արդյունաբերական ճյուղերի մրցունակության արդիականացման և շուկան մատչելի դարձնելու միջոցով» երկամյա ծրագրին: Ծրագրի նպատակն է Հայաստանում պահել և զարգացնել տեքստիլ և հագուստի արտադրությունը:
«Այս ծրագիրը հատկանշական է նրանով, որ հիմնական գործակցող կազմակերպությունները լինելու են տեղական: Առաջիկա վիճակագրությունը ցույց կտա որոշակի առաջանցիկ տեմպեր»,- ծրագրի մեկնարկից հետո լրագրողների հետ ճեպազրույցում ասաց ՀՀ էկոնոմիկայի նախարար Կարեն Ճշմարիտյանը:
Նախարարը նաև նշեց, որ հաջորդ տարվանից մեկնարկում են մի քանի խոշոր՝ 200-300-500 միլիոն դոլարի ներդրումային ծրագրեր, ինչպիսին է, օրինակ, «Ամուլսարի» ծրագիրը: Այդ ծրագրի իրականացման արդյունքում, Ճշմարիտյանի խոսքով, 2016-2017 թվականներին մենք կունենանք Հայաստանի մասշտաբով արտադրվող 12-14 տոննա ոսկի:
«Այստեղ միանգամից ծրագիրը դառնում է արդյունավետ, և այս կարգի բազմաթիվ ծրագրեր կան: Կարևոր է միայն մասնավոր ներդրողներին ներկայացնել, ներգրավել և ցույց տալ դրանց առավելությունները»,- ասաց Ճշմարիտյանը:
