Վարչապետ Հովիկ Աբրահամյանի և տարբեր տոնավաճառների առևտրականների՝ կառավարության նիստերի դահլիճում կայացած հանդիպումն անցավ բավական թեժ մթնոլորտում: Այդ քննարկումը որոշ պահերի վերածվում էր շուկայական մթնոլորտի, երբ ամեն մեկն իր պահանջն էր ներկայացնում և փորձում էր հնարավորինս բարձր գոռալ, որ վարչապետին լսելի լինի: Հովիկ Աբրահամյանն էլ հետ չէր մնում նրանցից՝ հորդորելով քննարկումը «բազարի» չվերածել:
Հիշեցնենք, որ վաղ առավոտից տարբեր տոնավաճառների աշխատողներ հավաքվել էին կառավարության շենքի մոտ՝ բողոքելով և պահանջելով իրենց նկատմամբ չկիրառել շրջանառության հարկը, որը փոփոխության է ենթարկվել, 3,5 տոկոսից դարձել է 1 տոկոս և ուժի մեջ է մտնում հոկտեմբերի 1-ից:
«Եթե հնարավոր է՝ հոկտեմբերի 1-ից մի՛ կիրառեք այս օրենքը: Մենք պատրաստ չենք այդ փոփոխությանը և ստիպված ենք ավելի շատ վճարել, որն արդեն մեր ուժերից վեր է: Այս օրենքը ժամանակատար և ծախսատար է, մենք ավելորդ ծախսեր ենք անելու, առանց այն էլ գործ չկա, և մարդիկ ահավոր նեղված են այս օրենքից: Հիմա փոքր ու միջին բիզնեսն ահավոր վիճակում է»,- արդեն կառավարության ներսում քննարկման ժամանակ դիմելով Հովիկ Աբրահամյանին՝ ասաց առևտրականներից մեկը: Մեկ ուրիշն էլ պատճառաբանեց, որ իրենք այդքան խելացի չեն, որ ամեն օր նման կարգի հաշվապահություն իրականացնեն:
Հովիկ Աբրահամյանի խոսքով՝ առևտրականների մտահոգությունները՝ կապված հոկտեմբերի 1-ի հետ, արդարացված չեն, և այդ օրվանից հարկայինը նրանց մոտ ստուգումներ չի իրականացնի: «Դուք հանգիստ եղեք: Մենք ձեզ որպես հարկատու չենք դիտարկում: Դուք որպես հարկատու մեզ հետաքրքիր չեք: Պարզապես խոշորները օգտագործում են ձեզ և շրջանցում են օրենքը: Մենք էլ ձեզ վերցնելով որպես հարթակ՝ ուզում ենք նրանց՝ խոշորներին, բերել հարկային դաշտ: Թե չէ դուք, կրկնում եմ, որպես հարկատու մեզ հետաքրքիր չեք»,- ասաց վարչապետը և բարկանալով անընդհատ կրկնվող նույն պահանջից՝ առևտրականներին թողեց ֆինանսների փոխնախարար Արմեն Ալավերդյանի հետ ու հեռացավ:
Ամեն դեպքում, վարչապետի հետ հանդիպումից հետո էլ առևտրականներին որևէ բան հասկանալի չդարձավ: «Ընդամենը փափուկ բարձ»,- հանդիպումից հետո ասաց առևտրականենրից մեկը՝ հավելելով, որ ինքը չի հավատում, որ հոկտեմբերի 1-ից հարկայինը իրենց չի հետապնդելու, իսկ եթե հետապնդի, ապա իրենք կփակեն իրենց խանութներն ու կհեռանան Հայաստանից:
Առավել մանրամասն՝ տեսանյութում:
