«Իսլամական պետություն» արմատական խմբավորմանը գերի ընկած՝ Մեծ Բրիտանիայի քաղաքացին ԱՄՆ-ին կոչ է արել հրաժարվել «Իսլամական պետության» դեմ ռազմական գործողությունից: Այս մասին հայտնում է Reuters-ը:
Բրիտանացու ուղերձի տեսանյութը հրապարակված է կազմակերպության SITE կայքում: Հավանաբար, տեսանյութում բրիտանացի լրագրող Ջոն Քենթլին է, սակայն այդ տվյալներն առայժմ հաստատված չեն: Գործակալությունը հայտնում է, որ տեսանյութը նկարահանվել է երեքշաբթի գիշերը՝ զինյալների դիրքերի ուղղությամբ ԱՄՆ ռազմաօդային ուժերի օդային հարվածների սկսվելուց առաջ:
Տեսագրության մեջ լրագրողն ասում է, որ լավ կլինի՝ ԱՄՆ նախագահ Բարաք Օբաման ավելի զգույշ լինի, որպեսզի իր երկրին նոր պատերազմի մեջ չներքաշի: Լրագրողը նաև հայտարարել է, որ «Իսլամական պետությունը» «պատմության մեջ երբևէ գոյություն ունեցած ամենաուժեղ շարժումն է», և որ դժվար թե ԱՄՆ-ին հաջողվի լուրջ վնաս հասցնել «Իսլամական պետությանը»:
Հիշեցնենք՝ ավելի վաղ համացանցում տարածվել էին «Իսլամական պետության» ահաբեկիչների ձեռքով ամերիկացի լրագրողներ Ջեյմս Ֆոուլիին և Սթիվեն Սոթլոֆին մահապատժի ենթարկելու տեսագրությունները:
