Թուրք դեմոկրատների առաջնորդներից Նամիկ Քեմալ Զեյբեկը պաշտոնական Անկարային մեղադրում է հայտնի ահաբեկչական խմբավորումներին՝ «Ալ-Քաիդա»-ին և «Թալիբան»-ին հովանավորելու մեջ:
Ինչպես հայտնում է թուրքական Gazeteciler Online պարբերականը, Քեմալ Զեյբեկը հայտարարել է, որ հենց կառավարության և իշխող «Արդարություն և զարգացում» կուսակցության հովանավորությամբ են վերջին շրջանում Սիրիա ներխուժել այդ խմբավորումների 10 հազար անդամներ:
Բոլոր գրոհայինները նախապես կենտրոնացվել են հատուկ ճամբարներում, որոնք ամերիկյան միջոցներով կառուցվել են Թուրքիայի ծայր արևելքում:
Նրանք Թուրքիա են հասել Պակիստանից և Աֆղանստանից օդանավով, այնուհետև Հաթայ նահանգից թուրքական կառավարությունը, ԱՄՆ ԿՀՎ-ի աջակցությամբ, նրանց ուղղել է Սիրիայի տարածք:
Որպես նման սենսացիոն հայտարարության աղբյուր՝ թուրք դեմոկրատների առաջնորդը մատնանշել է տվյալները, որոնք նա ստացել է Իրանի քաղաքական աղբյուրներից:
Զեյբեկը հաստատում է, որ 10 հազար իսլամիստ գրոհայինների շարքում առնվազն 3000-ը Թուրքիայի քաղաքացիներ են, որոնք հարում են նույն իսլամիստական համոզմունքներին և վերջին տարիների ընթացքում դաստիարակվել են իշխանամետ ուժերի կողմից: Կրոնական նկատառումներով նրանք ոչնչացրել են իրենց թուրքական անձնագրերը, քանի որ ատում են աշխարհին պետությունները:
Թուրք ընդդիմադրի խոսքերով՝ իր հրապարակած տեղեկությունը հնչեցվել է Իրանի ԱԳՆ-ի պաշտոնական հանդիպումներից մեկի ժամանակ:
