«Առաջին լրատվական»-ի Realpolitik հաղորդաշարի հյուրն է ԱԺ ՀՀԿ խմբակցության պատգամավոր Մանվել Բադեյանը:
–Քառյակը տրոհման առաջին նշաններն է ցույց տալիս, և արդեն հայտնի է, որ մարզային ու համապետական հավաքին Դաշնակցությունը չի մասնակցել ու: Նախ ինչպե՞ս եք գնահատում այդ փաստը:
–Բնական: Գոնե պատմական ռակուրսով որ նայենք՝ մենք երբևէ չենք կարող արձանագրել մի պահ մեր նոր պատմության մեջ, երբ կուսակցությունները ինչ-որ ֆորմատով բոլոր չափանիշներով միասնական լինել և կարողանան երկար գոյակցել: Ֆրագմենտալ համագործակցությունը, անշուշտ, միշտ եղել է և կլինի, բայց երկարատև ծրագրային միասնությունը բացառվում է այն պարզ պատճառով, որ դրանք տարբեր կուսակցություններ են, ունեն տարբեր գաղափարախոսություններ, ունեն տարբեր նպատակներ, տարբեր տեսլականներ, եթե ուզում եք իմանալ՝ տարբեր մարդկային տիպեր: Դրա համար սպասվում էր, դա սոսկ ժամանակի խնդիր էր։ Վստահ եմ, որ այդ տրոհումը կշարունակվի հետագայում: Հիմա չորս մինուս մեկ, հետո կդառնա երեք մինուս մեկ և այդպես…
–Ձեր խմբակցության ղեկավարն օրեր առաջ ասում էր, թե Հանրապետական կուսակցությունը չի ցանկանում, որ Քառյակը փլուզվի, և նշել էր, որ Հանրապետականի կողմից ոչ մի ցանկություն չկա այդ ուղղությամբ՝ ասում էր՝ մենք հետամուտ ենք լինում և պայմաններ ստեղծում, որ Քառյակը կայանա, և առողջ ընդդիմություն լինի: Որտեղի՞ց էր այս սերը Քառյակի նկատմամբ:
–Գույները մի քիչ թանձրացված է ասվել: Մի բան կարելի է հստակ ասել, որ Հանրապետական կուսակցությունը որևէ կերպ չի խառնվել Քառյակի գործունեությանը: Բնականոն ընթացքով զարգանում են Քառյակում բնական պրոցեսները, այդ թվում՝ նաև դրանից դուրս գալը: Դրան Հանրապետականը չի խառնվել: Ուրիշ բան, որ մենք՝ որպես իշխանական ուժ, իրոք շահագրգիռ ենք առողջ և ազդեցիկ օպոզիցիա ունենալու մեջ, որովհետև մենք հասկանում ենք, որ պետությունը չի կարող զարգանալ առանց օպոզիցիայի: Բայց ես չեմ պատկերացնում, թե մենք ինչ պիտի անենք, որ օպոզիցիան ուժեղանա:
–Օրինակ՝ չպետք է ճնշեք ձեր քաղաքական հակառակորդներին:
-Իսկ ինչպե՞ս ենք մենք ճնշում:
–Լևոն Տեր-Պետրոսյանն իր հրատապ հարցազրույցում նշում էր, թե դուք մտրակի օգնությամբ շուտով պատրաստվում եք Գագիկ Ծառուկյանի բիզնեսները ստուգել և նրան ճնշումների ենթարկել:
–Այդ սպեկուլացիաները միշտ կարելի է անել և դրան քաղաքական երանգ տալ: Համենայն դեպս, Գագիկ Ծառուկյանի բիզնեսը բիզնես է, իսկ քաղաքականությունը՝ քաղաքականություն: Դրանք իրար հետ կապ չունեն: Այդ դեպքում ցանկացած ստուգում կարելի է ներկայացնել որպես քաղաքական հաշվեհարդարի փորձ: Եվ ընդհակառակը՝ ցանկացած ոչ ստուգում կարելի է բնութագրել որպես քաղաքական աջակցության փորձ: Հիմա ի՞նչ, չստուգե՞նք բիզնեսները և այդպիսո՞վ աջակցենք ընդդիմության կայացմանը: Դա սպեկուլյատիվ հայտարարություն է և որևէ կապ չունի ընդդիմության կայացման հետ, որովհետև պարտադիր չէ, որ ընդդիմությունը բաղկացած լինի միայն բիզնեսմեններից:
–Ընդդիմությունն ասում է, որ սահմանադրական փոփոխությունների այս հայեցակարգը ժամանակավրեպ է, թեև կողմ են երկրում արմատական փոխոխություններին, սակայն նշում են, որ դրա ժամանակը չէ, երկրի առջև կանգնած խնդիրները շատ ավելի լուրջ քայլերի անհրաժեշտություն ունեն և, բնականաբար, դեմ են հանդես գալիս: Իշխանության կողմից մենք չենք տեսնում ընդառաջ քայլ:
–Բացի այն, որ հայտարարել են, թե ժամանակավրեպ է, նրանք ուրիշ փաստարկ չեն բերել: Հարցրեք ցանկացած մարդու, ՀՀ ցանկացած քաղաքացու: Ցանկացած քաղաքացի լուրջ փոփոխություններ է ուզում մեր հասարակության մեջ:
–Կարծում եք, որ այդ լուրջ փոփոխությունների համար սահմանադրությո՞ւնն է մեղավոր:
–Իհարկե, օրենքների օրենքը: Մեր ծառը ծուռ է աճում: Դա ակնհայտ է:
–2005 թ. այդ ծառը դուք եք ծուռ աճեցրել: Մի անգամ արդեն Սահմանադրություն եք փոխել:
–Իսկ Դուք ինձ ասեք մի պետություն, որտեղ Սահմանադրությունն ընդունվել է մեկընդմիշտ: Բոլոր Սահմանադրությունները զարգացումներ են ապրում:
–Սահմանադրությո՞ւնն է մեղավոր, որ պաշտոնյաները թալանում են, ընտրությունների ժամանակ Հանրապետականը գումարներ է բաժանում և իր համար ցանկալի արդյունքներ է ստանում:
–Դրանք տարբեր խնդիրներ են: Դա օրենքի կատարման, օրենքի պաշտպանման, օրենքի իրականացման խնդիր է: Այդ խնդիրը միշտ կա ցանկացած իշխանության ժամանակ, ցանկացած երկրում: Եվ կա մի ուրիշ խնդիր՝ իսկ ինքն օրենքը ինչպիսի՞ն է: Տվյալ դեպքում խոսքը մայր օրենքի մասին է: Նոր պետությունները ավելի արագ են փոխում իրենց սահմանադրությունները, որովհետև գալիս ու դեմ են առնում հենց այդ երևույթներին:
Հարցազրույցն ամբողջությամբ՝ տեսանյութում
