«Առաջին լրատվական»-ի զրուցակիցն է ՀՀ գյուղատնտեսության փոխնախարար Ռոբերտ Մակարյանը:
– Պարոն Մակարյան, այսօր գյուղացին բերքի մթերման, իրացման հետ կապված ի՞նչ խնդիրներ ունի:
– Մենք իրացման երեք ուղղություն ունենք՝ արտահանում, մթերում վերամշակող կազմակերպությունների կողմից, և արդեն 4-րդ տարին է՝ Երևան քաղաքում գործում են տոնավաճառներ՝մեկը «Մալիբու» սրճարանի հարևանությամբ, մյուսը՝ Կասյան փողոցին հարակից հատվածում: Արտահանման աշխատանքները շարունակվում են: Գիտեք, որ վերջին շրջանում ճանապարհների փակ լինելու հետ կապված որոշակի խնդիրներ եղան, բայց մթերքի արտահանման մասով խնդիրներ չեղան, պահվում էին սառնարանում և արտահանվում: Արտահանող կազմակերպությունները մեծ թափով սկսել են արտահանման գործընթացը: Մենք հույս ունենք, որ մինչև տարեվերջ, հատկապես դեպի ՌԴ, կկրկնապատկենք արտահանման ծավալները: Հաջորդ ուղղությունը, նշեցի, վերամշակումն է: Վերամշակող ընկերությունները արդեն 7-8 օր է՝ մեծ թափով սկսել են խաղողի մթերման գործընթացը:Պարբերաբար այցելում ենք գործարաններ, հետևում մթերումներին:
– Արտաշատի «Արտֆուդ» մթերումների գործարանը, գյուղացու վնասված բերքը չի մթերում: Մեր վերջին նկարահանման ժամանակ մարզի բնակիչները նշեցին, որ օրինակ՝ միջին որակի, վնասված դեղձը հանձնում են 30 դրամով, քանի որ ձեռքբերողը այն հանձնում է Արմավիրի գործարաններից մեկին:
– Կազմակերպությունները ունեն մթերման պլանավորում: Պահանջարկը հաշվառում ենք դեռևս տարվա սկզբից: Կան կազմակերպություններ, որոնց մթերման ծավալները լրացել են, և ուղղորդում ենք այլ կազմակերպություններ:Դեղձի մասով հիմա մթերում է «Նոյան» հյութերի գործարանը և այլն: Հիմնականում մթերքը, որը ավելի ապրանքային տեսք ունի, որակյալ դեղձը գնվել է արտահանող ընկերությունների կողմից:Բարձր գներով գնեցին, արտահանեցին ՌԴ: Բազմաթիվ գյուղեր կարող եմ մատնանշել, օրինակ՝ Այգեստանը: «Սպայկա» ընկերության ներկայացուցիչները եղան տեղում, այլ արտահանողներ եղան և գյուղերում բարձր գներով մթերեցին: Մթերման գործընթացը ընթանում է սահուն և կազմակերպված:
Հարցազրույցն ամբողջությամբ՝ տեսանյութում:
